(ភ្នំពេញ) – ក្នុងសន្និសីទសារព័ត៌មានដែលធ្វើឡើងកាលពីរសៀលថ្ងៃទី៦ ខែឧសភា អគ្គលេខាធិការសហព័ន្ធកីឡាបាល់ទាត់កម្ពុជាបានបញ្ជាក់ថា មូលហេតុដែលសហព័ន្ធសម្រេចចិត្តក្នុងការចាត់វិធានការចំពោះអតីត និងមន្រ្តីសហព័ន្ធចំនួន៤រូប ដោយព្យួរគ្រប់សកម្មភាពកីឡាបាល់ទាត់អស់មួយជីវិតនោះ គឺដោយសារតែមន្រ្តីទាំងនោះបានរំលោភលើសេចក្តីទុកចិត្ត។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានថ្លែងថា អំឡុងការសហការរវាង មន្ត្រីសហព័ន្ធ និងក្រុមហ៊ុនស្រាបៀរ Tiger រៀបចំការប្រកួតបាល់ទាត់ Tiger Street football តាំងពីឆ្នាំ ២០១៣ មកដល់ឆ្នាំ ២០១៩ រកឃើញថា មន្ត្រីសហព័ន្ធ ទាំង៤រូបនោះមានការកឹបកេងប្រាក់ជាង ៣០% ដោយគ្មានមូលហេតុមិនបានចូលមក សហព័ន្ធសោះ។
ក្រោយការបង្កើតគណកម្មការវិន័យ សហព័ន្ធ បានរកឃើញបន្ថែមថា ត្រឹមអំឡុងឆ្នាំ ២០១៥ ដល់ ២០១៩ មានការកិបកេងប្រាក់ជាង ៥៩៧៣៦ ដុល្លារដុល្លារឯណោះ។ អំពើនេះហើយ ទើបបានជាសហព័ន្ធបាល់ទាត់កម្ពុជា បានប្រជុំគ្នាជាច្រើនលើក រហូតដល់ឈានដល់ការពិន័យព្យួរសកម្មភាពបាល់ទាត់ពួកគេទាំង ៤នាក់រហូតមួយជីវិតតែម្ដង។ ខណៈដែលសាមីខ្លួនទាំង៤ ក៏បានសារភាពចំពោះកំហុសនេះដែរ។
សូមបញ្ជាក់ថា មន្រ្តីទាំង៤ដែលត្រូវសហព័ន្ធព្យួរគ្រប់សកម្មភាពកីឡាបាល់ទាត់អស់មួយជីវិតនោះ មាន លោក ម៉ែ តុលា, លោក ទុយ វិច្ឆិកា, លោក ឆាំង ពិសិដ្ឋ និងលោក គល់ សុភារម្យ។ ក្នុងនោះចំពោះលោក ម៉ៃ តុលា ត្រូវបញ្ជូនសំណុំរឿងប្រព្រឹត្តអំពើពុករលួយទៅតុលាការ៕