(ភ្នំពេញ)៖ ក្រោយពីក្រសួងសុខាភិបាលប្រទេសម៉ាឡេស៊ីបានប្រកាសពីការរកឃើញវីរុសកូរ៉ូណាថ្មី នៅលើអ្នកទេសចរម្នាក់ដែលបានធ្វើដំណើរតាមនាវា Westerdam ដែលចូលចតនៅកម្ពុជានោះ កាលពីថ្ងៃម្សិលមិញ ក្រសួងសុខាភិបាលកម្ពុជាបានកោះប្រជុំបន្ទាន់ ដោយក្រុមការងារបានឯកភាពលើវិធានការណ៍សុខភាពសាធារណៈមួយចំនួនចំពោះអ្នកដំណើរនៅលើនាវា Westerdam ទាំងអស់។
ក្នុងនោះ នឹងធ្វើការពិនិត្យសុខភាពអ្នកដំណើរលើនាវាខ្នាតធំវេស្ទឺដាមទាំងអស់នៅភ្នំពេញ និងនៅក្រុងព្រះសីហនុ ដើម្បីពិនិត្យរកមើលរោគសញ្ញាណាមួយដែលកើតឡើង។
ជាមួយគ្នានេះ រាល់បុគ្គលដែលធ្វើដំណើរលើនាវាវេស្ទឺដាម ត្រូវបន្តតាមដានសុខភាពរបស់ខ្លួនឲ្យបានហ្មត់ចត់ ហើយបុគ្គលដែលមានរោគសញ្ញាដូចជាក្តៅខ្លួន ក្អក ឬពិបាកដកដង្ហើម ត្រូវផ្តល់ព័ត៌មានទៅកាន់អាជ្ញាធរសុខាភិបាលក្នុងស្រុក និងប្រាប់ពីប្រវត្តិធ្វើដំណើរ។
បើតាមរបាយការណ៍របស់ក្រសួងសុខាភិបាលឲ្យដឹងថា ក្រោយការចូលចតនៅកំពង់ផែក្រុងព្រះសីហនុ កាលពីថ្ងៃទី១៤ ខែកុម្ភៈ ឆ្នាំ២០២០ មានមនុស្សចំនួន៤០៩នាក់ បានចុះចេញពីនាវាខ្នាតធំវេស្ទឺដាម ដោយធ្វើដំណើរតាមយន្តហោះចាកចេញពីអាកាសយានដ្ឋានអន្តរជាតិខេត្តព្រះសីហនុ និងបន្តជើងហោះហើរនៅអាកាសយានដ្ឋានអន្តរជាតិភ្នំពេញ ដើម្បីធ្វើដំណើរទៅកាន់ប្រទេសកំណើតរបស់ពួកគេ។
នៅថ្ងៃទី១៥-១៦ ខែកុម្ភៈ ឆ្នាំ២០២០ មានអ្នកដំណើរចំនួន៦០១នាក់បន្ថែមទៀត ពីនាវាដដែលមកកាន់អាកាសយានដ្ឋានអន្តរជាតិភ្នំពេញ ដើម្បីរង់ចាំការចេញដំណើរបន្តទៅកាន់ប្រទេសពួកគេ៕