ភ្នំពេញ៖ អាជ្ញាធរខេត្តព្រៃវែង បានលើកឡើងថា ខេត្តជាប់ព្រំប្រទល់ប្រទេសវៀតណាមមួយនេះ បានក្លាយជាជង្រុកស្រូវដ៏ធំជាងគេនៅក្នុងប្រទេសកម្ពុជា នៅដំណាលកាលប៉ុន្មានឆ្នាំចុងក្រោយនេះ បន្ទាប់ពីប្រជាកសិករងាកមកអនុវត្តតាមការណែនាំរបស់មន្ត្រីជំនាញ និងគួបផ្សំជាមួយភាពវៃឆ្លាតរបស់ពួកគាត់។
ថ្លែងក្នុងសន្និសីទសារព័ត៌មានស្តីពី វឌ្ឍនភាពនិងទិសដៅការងារបន្តរបស់រដ្ឋបាលខេត្តព្រៃវែង នៅថ្ងៃទី ០៩ ខែ កក្កដា នាទីស្តីការគណៈរដ្ឋមន្រ្តី លោក អ៊ុក សំណាងប្រធានមន្ទីកសិកម្ម រុក្ខាប្រមាញ់ និងនេសាទបានឲ្យដឹងថា ខេត្តព្រៃវែងជាខេត្តមួយដែលមានសក្តានុពលខ្ពស់ សើគ្រប់វិស័យជាពិសេសវិស័យស្រូវអង្ករ ដែលអាចទទួលបានបរិមាណផលច្រើនជាងគេនៅក្នុងប្រទេសកម្ពុជា ខណៈនៅក្នុងឆ្នាំ២០១៩-២០២០នេះ អាចផលិតបានរហូតដល់១លាន ៣សែនតោន។
លោកបានបញ្ជាក់ថា តាមរយៈបរិមានផលដែលទទួលបាននេះអាច មានសមត្ថភាពផ្គត់ផ្គត់បំពេញតម្រូវរបស់បងប្អូនប្រជាពលរដ្ឋក្នុងខេត្ត ថែមទាំងអាចនាំចេញដើម្បីបំពេញមត្រូវការរបស់ប្រជាជននៅក្នុងប្រទេសបានថែមទៀត ដោយមិនមានការព្រួយបារម្ភអ្វីឡើយ បើទោះបីប្រទេសកម្ពុជាកំពុងជួបនូវវិបត្តិកូវីដ១៩ក៏ដោយ។
បើតាមការបញ្ជាក់របស់លោកប្រធានមន្ទីរ ខេត្តព្រៃវែងមានប្រជាពលរដ្ឋប្រមាណ ៧៨,៦%ជាកសិករ និងជាខេត្តជាប់ចំណាត់ថ្នាក់លេខ១ ទូទាំងប្រទេសលើវិស័យកសិកម្ម (ឆ្នាំ២០១៩ និងឆ្នាំ២០២០)។ លោកបន្ថែមថា តុល្យភាពស្បៀងប្រចាំឆ្នាំ ក្រោយពីកាត់ចេញសម្រាប់ទុកបរិភោគ ទុកពូជ ចិញ្ចឹមសត្វ នៅសល់លើសពីតម្រូវការ គិតជាអង្ករ មានចំនួន ៥៦០.៧៤៧តោន ស្មើនឹងស្រូវចំនួន ៨៧៦,១៦៧តោន សម្រាប់លក់ទៅទីផ្សារក្នុង និងក្រៅប្រទេស ដែលមានតម្លៃជាមធ្យម ក្នុង១គីឡូក្រាម ៩២០រៀល៕