(ភ្នំពេញ)៖ មន្រ្តីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា គិតមកត្រឹមថ្ងៃនេះ មានរោងចក្រចំនួន១០ហើយបានដែលស្នើសុំព្យួរផ្នែកខ្លះ ព្រោះតែកង្វះវត្ថុធាតុដើមដែលនាំចូលមកពីប្រទេសចិន ហើយថា នៅអំឡុងខែមីនាខាងមុខនេះ មានរោងចក្រប្រមាណជា២០០ នឹងប្រឈមការបិទទ្វារផងដែរ។
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ បានថ្លែងក្នុងសន្និសីទដែលរៀបចំធ្វើឡើងដោយអង្គភាពអ្នកនាំពាក្យរាជរដ្ឋាភិបាលថា ខណៈដែលរោងចក្រប្រមាណ២០០គ្រោងនឹងបិទទ្វារនៅពេលខាងមុខនេះ គឺនឹងធ្វើឲ្យកម្មករ កម្មការិនីប្រមាណ ១៦ម៉ឺននាក់នឹងអត់ការងារធ្វើផងដែរ។ «បញ្ហាឥទ្ធិពលកូរ៉ូណានេះ គឺយើងបានដឹងថា នៅក្នុងខែមីនាខាងមុខនេះ គឺអាចមានរោងចក្រ សហគ្រាសខ្ទង់ជិត២០០ដែរ ដែលអាចប្រឈមទៅនឹងការកង្វះនូវវត្ថុធាតុដើម ហើយវាអាចប៉ះពាល់ដល់បងប្អូន កម្មករនិយោជិត ប្រហែល១៦ម៉ឺននាក់»។
យ៉ាងណាក៏ដោយ ដើម្បីដោះស្រាយបញ្ហាប្រឈមនេះ រាជរដ្ឋាភិបាលកម្ពុជា បានប្រើប្រាស់គ្រប់មធ្យោបាយទាំងអស់ សហការជាមួយភាគីចិន ដែលជាអ្នកផ្គត់ផ្គង់វត្ថុធាតុដើម ធ្វើយ៉ាងណាឲ្យរដ្ឋាភិបាលចិនផ្ដល់នូវអាទិភាពក្នុងការផ្គត់ផ្គង់ជូនមកប្រទេសកម្ពុជា ដែលបង្កលក្ខណៈឲ្យកង្វះវត្ថុធាតុដើមនេះ មានរយៈពេលខ្លី៕
