(កំពង់ស្ពឺ)៖លោកយាយ ស៊ីវ សាធ អាយុ៨៩ឆ្នាំរស់នៅភូមិស្ដុក ឃុំស្វាយចាចឹបស្រុកបសេដ្ឋខេត្តកំពង់ស្ពឺ ដែលកំពុងជួបវិបត្តិធ្ងន់ធ្ងរដោយសារតែចាញ់កល្បិចកូនស្រីពៅបោកយកលុយអស់ពីខ្លូនលែងបានព្យាបាលជំងឺ ពេលនេះបានសម្រចចិត្តដាក់ពាក្យប្តឹងកូនស្រីពៅនិងបក្ខពួកទៅអធិការដ្ឋាននគរបាលស្រុកបសេដ្ឋហើយ។
នៅថ្ងៃទី២៧ ខែកុម្ភៈ ឆ្នាំ២០២០ លោកយាយបានមកដាក់ពាក្យបណ្ដឹងប្ដឹងកូនស្រីពៅរបស់លោកយាយឈ្មោះ អ៊ួន លី និងបក្ខពួកតាមផ្លូវច្បាប់ដោយប្ដឹងពីបទកំហែង និងគម្រាមយក ហើយក្រុមសមត្ថកិច្ចនៃអធិការដ្ឋាននគរបាលស្រុកបសេដ្ឋបានទទួលពាក្យបណ្ដឹងយ៉ាងយកចិត្តទុកដាក់ដោយក្ដីអាណិតលោកយាយជាពន់ពេក។
បើយោងតាមការៀបរាប់ពីលោកស្រី អ៊ យ៉ា អាយុ៦២ឆ្នាំត្រូវជាកូនរបស់លោកយាយខាងលើបានឲ្យដឹងថា ម្ដាយរបស់លោកស្រីមានកូនចំនួន៤នាក់ហើយលោកស្រីជាកូនបងគេបង្អស់ ចំណែកកូនទី២ស្លាប់កូនទី៣ឈ្មោះ អ៊ រ៉េមអាយុ៥៦ឆ្នាំនិងកូនទី៤ដែលជាកូនពៅឈ្មោះអ៊ួន លីអាយុ៥២ឆ្នាំ។
លោកសី្របានរៀបរាប់ទៀតថា ក្នុងឆ្នាំ២០១៩បងប្អូនរបស់លោកស្រីបានមូលមតិគ្នាជាមួយម្ដាយសម្រេចលក់កេរ្តិ៍របស់ម្ដាយយកលុយទៅផ្ញើធនាគាដោយដាក់ឈ្មោះម្ដាយជាម្ចាស់កុង និងមានបងប្អូនចំនួន៣នាក់ទៅបើកទើបបើកលុយឲ្យម្ដាយបាន ព្រោះម្ដាយកាន់តែជរាទៅៗតែពេលយកទៅដាក់ស្រាប់តែកូនពៅឈ្មោះ អ៊ួន លី បានដាក់ឈ្មោះរបស់ខ្លួនជាអ្នកបើកទៅវិញ ហើយចំនួនលុយនោះគឺ៤៤លានរៀល។
ដោយកើតទុក្ខមិនសុខចិត្ត លោកស្រី អ៊ យ៉ា បាននាំម្ដាយជរាទៅជំទាស់ហើយឲ្យកូនពៅខាងលើដកលុយយកមកឲ្យម្ដាយជារាវិញ បន្ទាប់មកកូនពៅបានទៅដកលុយពីធនាគាថាយកមកឲ្យម្ដាយ តែផ្ទុយទៅវិញគេបែរជាបើកលុយបានមិនព្រមឲ្យម្ដាយទេ គឺគេយកលុយនោះទៅទុកនៅផ្ទះរបស់គេដោយប្រាប់ម្ដាយថា បើចង់បានលុយហ្នឹងលុះត្រាតែម្ដាយជរាព្រមប្រគល់ដីមួយដុំទុកសម្រាប់ធ្វើផ្នូរនោះឲ្យទៅខ្លួនទើបគេព្រមឲ្យលុយ៤៤លានរៀលនឹងវិញ។
បើយោងតាមក្រុមអ្នកច្បាប់បានឲ្យដឹងថា កូនស្រីពៅរបស់លោកយាយឈ្មោះអ៊ួន លីនិងបក្ខពួក អាចជាប់ចោទពីបទកំហែងយកក្នុងមាត្រាទី៣៦៣នៃក្រមព្រហ្មទណ្ឌ ដោយអាចជាប់ពន្ធនាគារចាប់ពី២ឆ្នាំដល់៥ឆ្នាំនិងពិន័យជាប្រាក់ពី៤លានដល់៨លានរៀល៕