ភ្នំពេញ ៖ ដោយសារតែជំងឺកូវីដ១៩ សហព័ន្ធស្រូវអង្ករកម្ពុជា បានសម្រេចប្ដូរពេលវេលា នៃការរៀបចំកម្មវិធី «វេទិកាស្រូវអង្ករកម្ពុជា លើកទី៧ » ដែលគ្រោងធ្វើ ចាប់ពីថ្ងៃទី៣០-៣១ ខែកក្កដា ឆ្នាំ២០២០ នេះ ទៅពេលក្រោយដោយមិនកំណត់ ។
យោងតាមសេចក្ដីជូនដំណឹងមួយ របស់សហព័ន្ធស្រូវអង្ករកម្ពុជា កាលពីថ្ងៃទី២៨ ខែកក្កដា ឆ្នាំ២០២០ ឲ្យដឹងថា «សហព័ន្ធស្រូវអង្ករកម្ពុជា សូមធ្វើការអភ័យទោស ដោយសូមប្ដូរពេលវេលា នៃការរៀបចំកម្មវិធី វេទិកាស្រូវអង្ករកម្ពុជា លើកទី៧ ពីថ្ងៃទី៣០-៣១ ខែកក្កដា ឆ្នាំ២០២០ ខាងមុខ នៅសណ្ឋាគារសូហ្វី តែលភ្នំពេញភូគីត្រា រាជធានីភ្នំពេញ ទៅពេលវេលាសមស្របមួយ ក្រោយពីស្ថានភាព នៃជំងឺរាតត្បាតកូវីដ១៩ បានល្អប្រសើរ ឡើងវិញ ។
ស្ថាប័ននេះបញ្ជាក់ថា ដោយសារស្ថានភាព នៃការឆ្លងរីករាលដាល នៃវីរុសកូរ៉ូណាប្រភេទថ្មី នាពេលបច្ចុប្បន្នកំពុងរីកសាយភាព និងបង្កភាពភ័យខ្លាច ដល់ប្រជាជន នៅលើពិភពលោក ដែលក្នុងនោះ រារាំងដល់ការធ្វើដំណើរជាអន្តរជាតិ និងការជួបជុំប្រមូលផ្ដុំ មនុស្សក្នុងចំនួនច្រើន ស្របពេលដែលទទួលបាន ការឆ្លើយតប និងស្នើសុំលុបការចូលរួម នៅក្នុងវេទិកាស្រូវអង្ករលើកទី៧ ដែលគ្រោងធ្វើឡើងនៅថ្ងៃទី៣០-៣១ ខែកក្កដា ឆ្នាំ២០២០ ពីសំណាក់វាយគ្មិនអន្តរជាតិ និងអ្នកទិញ មួយចំនួនធំ និងសំខាន់ៗ ជាពិសេសមកពីប្រទេសចិន និងបណ្ដាប្រទេសមួយចំនួន នៅអាស៊ាន និងអឺរ៉ុប និងដោយមានសំណូមពរពីសមាជិក សមាជិកា និងថ្នាក់ដឹកនាំសហព័ន្ធស្រូវអង្ករកម្ពុជា ចង់ឱ្យការរៀបចំនេះ ប្រកបដោយជោគជ័យ និងទទួលបាននូវលទ្ធ ផលល្អ ។
តែយ៉ាងណាក៍ដោយសហព័ន្ធស្រូវអង្ករកម្ពុជា បានឲ្យដឹងថា ចំពោះកាលបរិច្ឆេទជាក់លាក់ នៃវេទិកាស្រូវអង្ករលើកទី៧ សហព័ន្ធស្រូវអង្ករកម្ពុជា នឹងធ្វើការជម្រាបជូនជាថ្មីម្ដងទៀត នៅពេលក្រោយ ៕
