(អាមេរិក)៖ មន្រ្ដីជាន់ខ្ពស់អាមេរិក បានថ្លែងកាលពីថ្ងៃទី២៨ ខែកុម្ភៈ ថា មេដឹកនាំអាមេរិកបានសម្រេចផ្អាកចូលរួមប្រជុំជាមួយមេដឹកនាំ នៃបណ្ដាប្រទេសនៅតំបន់អាស៊ីភាគអាគ្នេយ៍ (អាស៊ាន) ដែលនឹងគ្រោងធ្វើនៅថ្ងៃទី១៤ ខែមីនាខាងមុខ។ ការប្រកាសផ្អាកនេះ ក៏ដោយសារតែមានការព្រួយបារម្ភអំពីការឆ្លងរីករាលដាល នៃវីរុសកូរ៉ូណា ឬ Covid-19។
គួរបញ្ជាក់ថា កាលពីចុងឆ្នាំមុន ប្រធានាធិបតីអាមេរិក លោក ដូណាល់ ត្រាំ បានអញ្ជើញមេដឹកនាំទាំង១០ នៃបណ្ដាប្រទេសអាស៊ានទៅចូលរួមប្រជុំនៅក្នុងទីក្រុងឡាសវេហ្គាស បន្ទាប់ពីលោកមិនបានទៅចូលរួមប្រជុំជាមួយនឹងមេដឹកទាំងនោះ នៅក្នុងទីក្រុងបាងកក កាលពីអំឡុងកិច្ចប្រជុំអាស៊ាននៅខែវិច្ឆិកា។
មន្រ្ដីជាន់ខ្ពស់អាមេរិក បានថ្លែងថា អាមេរិក ក៏ដូចជាសហគមន៍អន្ដរជាតិដទៃទៀត ត្រូវតែធ្វើការរួមគ្នា ដើម្បីយកជ័យជម្នះលើវីរុសរលាកផ្លូវដង្ហើមប្រភេទថ្មីនេះ។ នៅក្នុងការប្រឹក្សាយោបល់ជាមួយដៃគូអាស៊ាន គឺអាមេរិកពិតជាមានការលំបាកខ្លាំងណាស់ ក្នុងការសម្រេចចិត្តផ្អាកកិច្ចប្រជុំជាមួយបណ្ដាមេដឹកនាំអាស៊ាន។
មន្រ្ដីអាមេរិកជាន់ខ្ពស់អាមេរិក បានបញ្ជាក់ថា អាមេរិកបានឲ្យតម្លៃខ្ពស់ដល់ទំនាក់ទំនងមិត្តភាពជាមួយបណ្ដាប្រជាជាតិអាស៊ីអាគ្នេយ៍ និងសម្លឹងមើលពីទំនាក់ទំនងលើវិស័យសំខាន់ៗជាច្រើន នាពេលអនាគត។
ទោះជាយ៉ាងណា ក្រសួងការបរទេសអាមេរិក មិនបានឆ្លើយតបភ្លាមៗ ចំពោះការសុំធ្វើអត្ថាធិប្បាយណាមួយជុំវិញបញ្ហាការផ្អាកមកចូលរួមប្រជុំនោះទេ៕