អន្តរជាតិ ៖ អ្នកនាំពាក្យក្រសួងពាណិជ្ជកម្មចិន បានឲ្យដឹងកាលពីថ្ងៃទី០៣កញ្ញា ម្សិលមិញថា ពេលនេះឥណ្ឌាកំពុងតែរកលេស ដើម្បីរាំងខ្ទប់ទំនិញចិន មិនឲ្យចូលប្រទេសរបស់ខ្លួន ។
លោក ហ្កាវ ហ្វេង បានប្រាប់ក្រុមអ្នកកាសែតថា« ឥណ្ឌាបានលើកយកបញ្ហាសន្តិសុខជាតិធ្វើជាលេស និងអនុម័តវិធានការតឹងរឹងប្រឆាំងនឹងក្រុមហ៊ុនចិន » ។
សេចក្ដីថ្លែងនេះបានធ្វើឡើង បន្ទាប់ពីឥណ្ឌាបានដាក់វិធានការរឹតបន្តឹងខ្លាំងទៅលើទំនិញនានាដែលនាំចូលពីប្រទេសចិន ពិសេសនោះគឺការបិទកម្មវិធីប្រើទូរស័ព្ទចំនួន១១៨របស់ចិន បន្ទាប់ពីជម្លោះព្រំដែននៃប្រទេសទាំងពីរកើនកំដៅ ។
ជាការកត់សម្គាល់ ក្នុងចំណោមកម្មវិធីរបស់ចិនសម្រាប់ប្រើលើទូរស័ព្ទដៃទាំង ១១៨ដែលឥណ្ឌាបានហាមឃាត់នោះ មានកម្មវីធីល្បែង សេវាសម្រាប់បង់លុយតាមអនឡាញ សេវាសម្រាប់ការស្វែងជួបគ្នារវាងមនុស្ស រួមទាំងកម្មវិធីសម្រាប់កាត់ ត រូបភាពថតពី Selfiies ទៀតផង។ ដែលក្នុងនោះមានកម្មវិធីល្បែងវីដេអូដ៏ល្បី PUBG ដែលមានយុវវ័យឥណ្ឌាប្រើរាប់លាននាក់។ ក្រសួងព័ត៌មានបច្ចេកវិទ្យាឥណ្ឌាបានលើកយកហេតុផលទៅពន្យល់ថា មានកម្មវីធីខ្លះ ដូចជាកម្មវិធី PUBG និងកម្មវីធីផ្សេងទៀតនៃក្រុមហ៊ុនអ៊ីនធឺណែតចិន Tencent បានលួចយកទិន្នន័យអ្នកប្រើ និងអនុញ្ញាតឲ្យមានសកម្មភាពប្រឆាំងអធិបតេយ្យ បូរណភាពរបស់ឥណ្ឌា វិស័យការពាររបស់ឥណ្ឌា វិស័យសន្តិសុខរបស់រដ្ឋ និងធ្វើឲ្យប៉ះពាល់ដល់សណ្តាប់ធ្នាប់សាធារណៈ។
សូមបញ្ជាក់ថា នេះមិនមែនជាលើកទី១ទេ ដែលឥណ្ឌាចាត់វិធានការនេះលើចិន។ ក្នុងខែមិថុនា ឥណ្ឌាបានបិទខ្ទប់ ៥៩កម្មវិធីរបស់ចិន ក្នុងនោះក៏មានកម្មវិធីចែកចាយវីដេអូដ៏ពេញនិយម Tik tok ដែរ។ បន្ទាប់មកក្នុងខែកក្កដា ឥណ្ឌាបានបិទខ្ទប់ចំនួន ៤៧កម្មវិធីទៀត ៕