អ្នកនាំពាក្យក្រសួងសុខាភិបាលបានសម្តែងការបារម្ភ ចំពោះហានិភ័យ នៃការចម្លងវីរុសកូវីដ១៩ទៅដល់សហគមន៍ ក្រោយពីមានបុរសជនជាតិហុងគ្រីម្នាក់បានរត់គេចពីកន្លែងចត្តាឡីស័ករបស់គាត់នៅខេត្តសៀមរាប ក្រោយពីមន្ទីរសុខាភិបាលខេត្តនេះបានសង្ស័យថា គាត់មានវីរុសកូវីដ១៩។
តាមការបញ្ជាក់របស់ក្រសួងសុខាភិបាល បុរសជនជាតិហុងគ្រីរូបនេះមានអាយុ៧០ឆ្នាំ, ស្នាក់នៅភូមិគ្រួស ឃុំស្វាយដង្គុំ ក្រុងសៀមរាប ហើយត្រូវរាយការណ៍ដោយមន្ទីរពិសោធន៍ នៃមន្ទីរពេទ្យខេត្តសៀមរាប។
បើតាមការបញ្ជាក់របស់ក្រសួងសុខាភិបាល បុរសជនជាតិហុងគ្រីនេះ ជាអ្នកធ្វើដំណើរពីប្រទេសបារាំង បន្តជើងហោះហើរតាមប្រទេសកូរ៉េខាងត្បូង បានមកដល់កម្ពុជានៅ ថ្ងៃទី១៣ ខែកញ្ញា ឆ្នាំ២០២០ ហើយការធ្វើតេស្តដំបូងមិនមានវិជ្ជមានកូវីដ១៩ទេ។ បន្ទាប់មកគាត់ត្រូវបានបន្តធ្វើចត្តាឡីស័កនៅកន្លែងស្នាក់នៅរបស់គាត់នៅខេត្តសៀមរាប រហូតដល់ថ្ងៃទី១៣ នៃការធ្វើចត្តាឡីស័ករបស់គាត់ ត្រូវនឹងថ្ងៃទី២៥ ខែកញ្ញា ឆ្នាំ២០២០ ដែលមានការធ្វើតេស្តឡើងវិញ ក៏បានបង្ហាញលទ្ធផលសង្ស័យថា វិជ្ជមានវីរុសកូវីដ១៩ ហើយវត្ថុសំណាករបស់គាត់ត្រូវបានបញ្ជូនមកកាន់វិទ្យាស្ថានប៉ាស្ទ័រ នៅរាជធានីភ្នំពេញ។
យ៉ាងណាក៏ដោយ ខណៈកំពុងរង់ចាំលទ្ធផលវិភាគ គេមិនអាចទាក់ទងបុរសរូបនោះបានឡើយ ដោយបុរសជនជាតិហុងគ្រីនោះបានរត់ចេញពីកន្លែងស្នាក់នៅ ហើយបច្ចុប្បន្នអាជ្ញាធរខេត្តសៀមរាបកំពុងតាមរកបុរសជនជាតិហុងគ្រីរូបនោះ៕