អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងថា ក្រសួងបានរកឃើញមនុស្សចំនួន ៣៦នាក់ ដែលមានការពាក់ព័ន្ធជាមួយនឹងបុរសជនជាតិហុងគ្រីផ្ទុកជំងឺកូវីដ១៩ បន្ទាប់ពីអ្នកជំងឺរូបនេះ បានរត់គេចចេញពីកន្លែងធ្វើចត្តាឡីស័ក ក្នុងខេត្តសៀមរាប កាលពីចុងសប្តាហ៍កន្លងទៅ។
យ៉ាងណាក៏ដោយ ក្រសួងបានយកវត្ថុសំណាកមនុស្សទាំង៣៦នាក់ទៅវិភាគ ក្នុងនោះភាគច្រើនគឺសុទ្ធតែអវិជ្ជមាន ហើយអ្នកនៅសល់ប៉ុន្មានទៀតត្រូវបានធ្វើតេស្តជាបន្តបន្ទាប់។
បើតាមលោកស្រី ឱ វណ្ណឌីន ក្នុងចំណោមអ្នកពាក់ព័ន្ធទាំងនេះ មានដូចជា ភរិយារបស់គាត់ អ្នកបើកឡានតាក់ស៊ី និងម៉ូតូកង់បីឱ្យគាត់ បុគ្គលិកធនាគារ និងអ្នកលក់ផ្ទាំងគំនូរឲ្យគាត់ជាដើម។
គួររំលឹកថា កាលពីចុងសប្តាហ៍កន្លងទៅនេះ មានបុរសជនជាតិហុងគ្រី អាយុ ៧០ឆ្នាំម្នាក់រស់នៅក្រុងសៀមរាប ដែលទើបត្រឡប់មកពីប្រទេសបារាំង ត្រូវគេរកឃើញថាមានវិជ្ជមានវីរុសកូវីដ១៩។ ក្នុងអំឡុងពេលនៃការរង់ចាំលទ្ធផល បុរសហុងគ្រីរូបនោះ គាត់បានរត់គេចចេញពីកន្លែងធ្វើចត្តាឡីស័ក ទៅសម្ងំនៅវីឡាមួយកន្លែងក្នុងក្រុងសៀមរាប។ ករណីនេះក្រសួងសុខាភិបាល បានសម្តែងនូវការបារម្ភ ដោយខ្លាចថា អាចនឹងមានហានិភ័យឆ្លងចូលសហគមន៍៕
