បន្ទាយមានជ័យ ៖ យ៉ាងហោចណាស់ពលរដ្ឋខ្មែរ៤នាក់ត្រូវបានទាហានឈុតខ្មៅថៃឃាត់ខ្លួន កាលពីថ្ងៃទី២៩កញ្ញា ឆ្នាំ ២០២០ នៅក្នុងស្រុកអារញ្ញប្រាថេត ខេត្តស្រះកែវ ប្រទេសថៃ គ្រាដែលពួកគេឆ្លងដែនចូលទៅស្វែងរកការងារធ្វើក្នុងប្រទេសជាប់ព្រំប្រទល់គ្នាមួយនេះ ។
យោងតាមសេចក្ដីរាយការណ៍ថា ទាហានការពារព្រំដែនថៃប្រចាំស្រុកអារញ្ញប្រាថេត បានធ្វើការឃាត់រថយន្តមួយគ្រឿងម៉ាកនីសាន់ពាក់ស្លាកលេខ ២៤៤៧ ឈុនបុរី បើកបរដោយបុរសជនជាតិខ្មែរ ឈ្មោះ យ៉ឹង បូរី អាយុ ៣៩ឆ្នាំ ស្រុកកំណើត ភូមិតាផូ ឃុំស្វាយចេក ស្រុកស្វាយចេក ខេត្តបន្ទាយមានជ័យ ។ ក្រោយធ្វើការឆែកឆេររថយន្តរកឃើញពលរដ្ឋខ្មែរចំនួន ០៤នាក់ មិនមានប្រវត្តិចេញចូលប្រទេសថៃ ហើយបាបញ្ជូនពួកគេទៅកាន់អធិការដ្ឋានតម្រួតប៉ុស្តិ៍អារញ្ញយ៉ាប្រាថេត ដើម្បីចាត់វិធានការតាមផ្លូវច្បាប់។
សូមបញ្ជាក់ថា កាលពីថ្ងៃទី២៨កញ្ញា ទាហានឈុតខ្មៅថៃ ក៍បានចាប់ឃាត់ខ្លួនប្រជាពលរដ្ឋខ្មែរចំនួន៧នាក់នៅក្នុងស្រុកអារញ្ញប្រាថេត ដែលបានលួចឆ្លងដែនដោយខុសច្បាប់ដើម្បីស្វែងរកការងារធ្វើនៅក្នុងប្រទេសគេផង ដែរ ៕
