(កំពង់ឆ្នាំង)៖ បុគ្គលិក នៃក្រុមហ៊ុនអចលនទ្រព្យ LOD សាខាខេត្តកំពង់ឆ្នាំងចំនួន៤នាក់ ត្រូវបានកម្លាំងសមត្ថកិច្ចធ្វើការឃាត់ខ្លួន ក្រោយពីពួកគេបានសម្រុកចូលផ្ទះប្រជាពលរដ្ឋ និងកាត់សោយកម៉ូតូកូនបំណុល ដោយពុំមានដីកា ក្រោយអាក់ខានមិនបានបង់ការចំនួន៣ខែ។
ហេតុការណ៍នេះ បានកើតឡើងកាលពីថ្ងៃទី២៩ ខែកញ្ញា ឆ្នាំ២០២០ ស្ថិតនៅភូមិកំពង់បាស្រូវខាងត្បូង ឃុំជលសារ ស្រុកជលគិរី ខេត្តកំពង់ឆ្នាំង ។
បើតាមលោក អ៉ិត សុធា ព្រះរាជអាជ្ញា អយ្យការអមសាលាដំបូងខេត្តកំពង់ឆ្នាំងថា បុគ្គលិកក្រុមហ៊ុនអចលនទ្រព្យអិលអូឌី ដែលត្រូវឃាត់ខ្លួននោះ មាន ១.ឈ្មោះ វ៉ែន រិត ភេទប្រុស អាយុ ២៧ ឆ្នាំ, ២.ញ៉េស សារីន ភេទប្រុស.អាយុ២១ឆ្នាំ, ៣.អៀន វណ្ណា ភេទប្រុស អាយុ២៧ ឆ្នាំ និងទី៤ឈ្មោះ ហេង គង្គារ អាយុ២៨ឆ្នាំ មានតួនាទីជាប្រធានសាខាខេត្តកំពង់ឆ្នាំង និងជាអ្នកផ្តើមគំនិត។
ចំណែកវត្ដុតាងសមត្ថកិច្ចដកហូត រួមមានម៉ូតូចំនួន០២ គ្រឿង, ទូរស័ព្ទដៃចំនួន៤គ្រឿង, ច្រវ៉ាក់ចំនួន២ខ្សែ, ពូថៅ ចំនួន ១ , កូនសោរ ចំនួន ២ និងដែកទីប ប្រវែង ១.៦ សង់ទីម៉ែត្រ។
ជនសង្ស័យទាំង៤នាក់ ត្រូវបានឃាត់ខ្លួនពីបទបំផ្លិចបំផ្លាញទ្រព្យសម្បត្តិអ្នកដ៏ទៃដោយចេតនា ហើយត្រូវបានបញ្ជូនទៅទីបញ្ជាការកងរាជអាវុធហត្ថខេត្តកំពង់ឆ្នាំង ដើម្បីកសាងសំណុំរឿងបញ្ជូនទៅតុលាការនៅព្រឹកថ្ងៃទី៣០ ខែកញ្ញាឆ្នាំ២០២០នេះដើម្បីចាត់ការតាមនីតិវិធីច្បាប់៕