នៅក្នុងរយៈពេលប៉ុន្មានថ្ងៃមកនេះ នៅលើបណ្តាញសង្គម មានពលរដ្ឋខ្មែរមិនតិចទេបានសម្តែងនូវការមិនសប្បាយចិត្ត ក្រោយពីបានឃើញសណ្ឋាគារមួយស្ថិតនៅលើកោះ Phangan ខេត្ត Surat Thani ប្រទេសថៃ បានសាងសង់ឡើងដោយចម្លងទាំងស្រុងរចនាបទប្រាសាទបាយ័ន អង្គរវត្ត និងប្រាសាទបន្ទាយស្រី របស់ខ្មែរ។
ក្នុងចំណោមពលរដ្ឋខ្មែរទាំងនោះ គេក៏ឃើញគណនីហ្វេសប៊ុក របស់លោក William Guang ក៏បានសម្តែងនូវការមិនពេញចិត្តផងដែរ ដោយលោកបានសរសេរនៅលើបណ្តាញសង្គមរបស់លោកថា «មិនចង្អៀតចង្អល់ទេចំពោះការដាក់ខ្លួនថាគ្មានវប្បធម៌ហេីយបង្ហាញថាខ្លួនទទួលឥទ្ធិពលវប្បធម៌ពីខ្មែរ តែមុនធ្វេីមានបានសុំម្ចាស់ឬទេ ? វាបង្ករការយល់ច្រឡំធំណាស់ទៅកាន់សកលលោក»។
យ៉ាងណាក៏ដោយ ចំពោះករណីនេះ លោក ឡុង ប៊ុណ្ណសេរីវឌ្ឍន៍ អ្នកនាំពាក្យក្រសួងវប្បធម៌ និងវិចិត្រសិល្បៈ បានបញ្ជាក់ថា លោកមិនទាន់បានដឹងជុំវិញរឿងរ៉ាវនេះទេ ហើយលោកកំពុងបញ្ជូនរូបភាពនេះទៅអាជ្ញាធរជាតិអប្សរា ដើម្បីសាកសួរអ្នកជំនាញជុំវិញបញ្ហានេះ។
លោកថា «វាជារឿងល្អបើគេយកទៅផ្សព្វផ្សាយ ប៉ុន្តែអ្វីដែលជាបញ្ហាគឺ ពាក់ព័ន្ធនឹងសិទ្ធិ ប្រៀបបាននឹងសិទ្ធិអ្នកនិពន្ធ ដែលសិទ្ធិសីលធម៌ហ្នឹង អ្នកឯងត្រូវតែដាក់ថាប្រាសាទនេះ ប្រាសាទកម្ពុជា ប្រាសាទអង្គរ កម្ពុជា ប្រាសាទបន្ទាយស្រីកម្ពុជា អាហ្នឹងជួយផ្សព្វផ្សាយលើកតម្កើង អត់ខុសទេ ប៉ុន្តែត្រូវរក្សាសិទ្ធិម្ចាស់ដើមថាជារបស់ខ្មែរ»៕