(ភ្នំពេញ)៖ កម្មករប្រមូលសំរាមរបស់ក្រុមហ៊ុនស៊ិនទ្រីបានធ្វើកូដកម្មតាំងតែពីល្ងាចថ្ងៃទី២ ខែតុលា ឆ្នាំ២០២០ ដោយមិនធ្វើការចេញប្រមូលសំរាម ដើម្បីស្នើឲ្យក្រុមហ៊ុនដោះស្រាយនូវបញ្ហាមួយចំនួន ដោយវាបណ្តាលឲ្យសំរាមត្រូវកកស្ទះនៅតាមដងផ្លូវនានាក្នុងរាជធានីភ្នំពេញ។
ការទាមទាររបស់ក្រុមកម្មករទាំងនោះ រដ្ឋបាលរាជធានីភ្នំពេញបានចាត់ទុកថា មិនស្របតាមច្បាប់ស្តីពីការងារ និងលិខិតបទដ្ឋានគតិយុត្តិឡើយ ហើយអំពាវនាវឲ្យបងប្អូនកម្មករបញ្ឈប់ការធ្វើកូដកម្ម ដោយយកបញ្ហាសំរាមជាចំណាប់ខ្មាំង ហើយត្រូវចូលបម្រើការងារធម្មតាវិញយ៉ាងយូរបំផុតនៅថ្ងៃចន្ទ ទី៥ ខែតុលា ឆ្នាំ២០២០ជាកំហិត បើពុំដូច្នោះទេ រដ្ឋបាលរាជធានីភ្នំពេញនឹងប្រកាសជ្រើសរើសកម្មករថ្មី ដើម្បីបំពេញការងារផ្តល់សេវាប្រមូល និងដឹកជញ្ជូនសំរាមដោយមិនទទួលយកកម្មកររបស់ក្រុមហ៊ុនស៊ិនទ្រីឡើយ។
តែយ៉ាងណាក៏ដោយ ជាមួយគ្នានេះ រដ្ឋបាលរាជធានីភ្នំពេញ ក៏បានស្នើដល់បងប្អូនប្រជាពលរដ្ឋរស់នៅក្នុងរាជធានីទាំងអស់ សូមវេចខ្ចប់ ទុកដាក់ និងបញ្ចេញសំរាមរបស់ខ្លួនឲ្យបានត្រឹមត្រូវតាមពេលវេលាដែលបានកំណត់ ហើយថា រដ្ឋបាលរាជធានីភ្នំពេញបាននឹងកំពុងចាត់វិធានការ ដោយប្រើប្រាស់រថយន្តដឹកសំរាមរបស់រដ្ឋបាលរាជធានីភ្នំពេញ និងឲ្យអាជ្ញាធរខណ្ឌទាំង១៤ បញ្ចេញម៉ូតូកង់បីដឹកសំរាម និងកម្លាំងដើម្បីប្រមូលសំរាមនៅតាមមូលដ្ឋានខណ្ឌរៀងៗខ្លួន៕