បើតាមអ្នកនាំពាក្យក្រសួងធនធានទឹក និងឧតុនិយមបានឲ្យដឹងថា បច្ចុប្បន្ននេះ ជំនន់ទឹកភ្លៀងកំពុងតែវាយប្រហារខេត្តពោធិ៍សាត់ និងបាត់ដំបង ដោយបង្ករឲ្យដីស្រែ និងផ្ទះសម្បែងរបស់ប្រជាពលរដ្ឋនៅក្នុងខេត្តទាំងពីរនេះរងការខូចខាត។
លោក ចាន់ យុត្ថា អ្នកនាំពាក្យក្រសួងធនធានទឹក បានបញ្ជាក់ថា ជំនន់ទឹកភ្លៀងក្នុងខេត្តទាំងពីរនេះ គឺខេត្តពោធិ៍សាត់មានសភាពធ្ងន់ធ្ងរជាងខេត្តបាត់ដំបង ព្រោះខេត្តពោធិ៍សាត់មានទឹកធ្លាក់ពីជួរភ្នំក្រវាញ ហើយហូរតាមរយៈស្ទឹងពោធិ៍សាត់ ដែលជាហេតុធ្វើឱ្យកម្ពស់ទឹកស្ទឹងខេត្តពោធិ៍សាត់មានការកើនឡើង។
យ៉ាងណាក៏ដោយ បើតាមការព្យាករ ស្ថានភាពទឹកជំនន់នៅខេត្តពោធិ៍សាត់ បើសិនជាពុំមានភ្លៀងធ្លាក់បន្ថែមគឺត្រូវការរយៈពេលប្រហែលពី២៤-៣៦ម៉ោងទៀត ស្ថានភាពទឹកមានភាពធូរស្រាលវិញ។
ចំណែកឯនៅខេត្តបាត់ដំបង ភ្លៀងធ្លាក់នៅក្នុងរយៈពេល៣ថ្ងៃនេះ ធ្វើឲ្យកម្ពស់ទឹកនៅខេត្តបាត់ដំបងកើនឡើង២០០មម។ តែយ៉ាងណា ខេត្តបាត់ដំបងជាខេត្តមួយដែលសម្បូរទៅដោយភ្នំ ដូច្នេះក្រសួងព្យាករណ៍ថា ជំនន់ទឹកភ្លៀងអាចនឹងស្រកលឿនជាខេត្តពោធិ៍សាត់៕