(ភ្នំពេញ)៖ ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃម្សិលមិញនេះ (៩ មីនា) បានធ្វើការអំពាវនាវមួយទៅដល់ក្រុមហ៊ុនអភិវឌ្ឍអចលនវត្ថុទាំងអស់ សូមផ្តល់ភាពទន់ភ្លន់អំពីលក្ខខណ្ឌ នៃការបង់ប្រាក់ចំពោះការទិញលំនៅដ្ឋានរបស់កម្មករ-និយោជិតណាដែលទទួលរងផលប៉ះពាល់ នៃការរីករាលដាលជំងឺរលាកផ្លូវដង្ហើមធ្ងន់ធ្ងរ Covid-19 ។
ជាមួយគ្នានេះ ក្រុមហ៊ុនអភិវឌ្ឍអចលនវត្ថុ គួរធ្វើការបញ្ចុះថ្លៃផ្ទះក្នុងកម្រិតសមស្រប ខណៈដែលរាជរដ្ឋាភិបាលកម្ពុជាបានសម្រេចផ្តល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដែលមានតម្លៃស្មើ ឬទាបជាង ៧ម៉ឺនដុល្លារ ក្នុងរយៈពេល១ឆ្នាំនេះផងដែរ៕