(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ បានថ្លែងនៅព្រឹកមិញនេះថា អាជ្ញាធរបានត្រៀម ជម្លៀសប្រជាពលរដ្ឋ ដែលប្រឈមនឹងការលិចលង់ខ្លាំងទាំងក្នុងក្រុងពោធិ៍សាត់ និងតំបន់ផ្សេងៗទៀត ទៅរកទីទួលសុវត្ថិភាព។
បើតាមលោក កែវ វ័យ ប្រធានមន្ទីរធនធានទឹក និងឧតុនិយមខេត្តពោធិ៍សាត់បានឲ្យដឹងនាព្រឹកថ្ងៃទី១០ ខែតុលា ឆ្នាំ២០២០នេះថា បច្ចុប្បន្នជំនន់ទឹកភ្លៀង បាននឹងកំពុងវាយប្រហារ ស្រុកភ្នំក្រវាញ លិចផ្លូវជាតិលេខ៥៥ ចំនួន០២កន្លែង ក្នុងឃុំសំរោង និងលិចទំនប់បង្ហៀរកាត់ស្ទឹងអារ៉ៃ ក្នុងឃុំរកាត មួយកន្លែងទៀត មិនអាចឱ្យអ្នកដំណើរឆ្លងកាត់បាននោះទេ លុះត្រាតែរង់ចាំទឹកស្រកសិន។
នៅក្រុងពោធិ៍សាត់វិញ ទឹកបានហៀរលើខឿនមាត់ស្ទឹងខាងមុខសាលាខេត្ត ខាងមុខមន្ទីរពេទ្យ លិចផ្លូវគ្រួសក្រហម សាលារៀន និងផ្ទះសម្បែងប្រជាពលរដ្ឋមួយចំនួន ដែលរស់នៅតាមខ្នងប្រឡាយ មាត់ស្ទឹង និងជាយៗក្រុង។
ចំពោះស្រុកណ្ដៀងហូរចាក់សាលាបឋមសិក្សាពោធិ៍កំបោរ ហៀរលើផ្លូវគ្រប់ទីកន្លែង និងមានកាត់ផ្ដាច់ផ្លូវថ្នល់មួយចំនួនផងដែរ។
ចំណែកឯស្រុកវាលវែងវិញមិន ជាបញ្ហាប៉ុន្មាននោះទេ ដោយសារនៅតំបន់ភ្នំ ទឹកលិចផ្លូវតែពេលកំពុងភ្លៀងប៉ុណ្ណោះ លុះពីរបីម៉ោងក្រោយមកទឹកនឹងហូរមកផ្នែកខាងក្រោមអស់ហើយ៕
