(ភ្នំពេញ)៖ ក្រសួងធនធានទឹក និងឧតុនិយម បានធ្វើការអំពាវនាវដល់បងប្អូនប្រជាពលរដ្ឋទាំងអស់ដែលរស់នៅបណ្តាខេត្តភាគពាយព្យ និងភាគខាងជើង ក្នុងភូមិសាស្រ្តជួរភ្នំដងរែក និងជួរភ្នំក្រវាញ សូមបង្កើនការប្រុងប្រយ័ត្នខ្ពស់ ព្រោះតែភ្លៀងនឹងអាចបន្តរយៈពេលច្រើនថ្ងៃទៀត។
តាមការបញ្ជាក់របស់ក្រសួងថា កម្ពុជាកំពុងស្ថិតនៅក្នុងតំបន់សម្ពាធទាប ហើយកំពុងបន្តទទួលឥទ្ធិពលនៃប្រព័ន្ធសម្ពាធទាប (ITCZ) ហើយសម្ពាធទាបសកម្ម (Action Low) នៅចុងសម្ព័ន្ធនៃសម្ពាធទាបនឹងវិវត្តប្រែប្រួលជាបន្តបន្ទាប់។
ជំនន់ទឹកភ្លៀងដែលបានធ្វើឲ្យជន់លិចខេត្តប៉ៃលិនកាលពីពេលថ្មីៗនេះ (រូប៖ ក្រសួងធនធានទឹក)
ករណីនេះ នឹងបង្កឲ្យកម្ពុជាមានភ្លៀងធ្លាក់បន្តច្រើនទៅថ្ងៃខាងមុខទៀត ក្នុងកម្រិតមធ្យមទៅច្រើន ដែលបណ្តាលឲ្យភាគពាយ័ព្យ និងភាគខាងជើង ស្ថិតនៅក្នុងភូមិសាស្ត្រជួរភ្នំដងរែក និងជួរភ្នំក្រវាញ នៅតំបន់មាត់សមុទ្រ លើផ្ទៃសមុទ្រ អាចមានភ្លៀងបន្ថែមទៀត ធ្វើឲ្យខ្យល់បោកបក់លាយឡំ និងរលកសមុទ្រខ្ពស់ៗជាដើម។
ដូច្នេះ អាជ្ញាធរគ្រប់លំដាប់ថ្នាក់ និងសាធារណៈជន ជាពិសេសប្រជាពលរដ្ឋដែលរស់នៅតំបន់ខាងលើនេះ ប្រុងប្រយ័ត្នខ្ពស់បន្ថែមទៀត ដើម្បីជៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
