(តាកែវ)៖ សង្វៀនជល់មាន់ក្រោមផ្លាកកាស៊ីណូ ស្ថិតនៅក្បែរច្រកទ្វារអន្តរជាតិភ្នំដិន ពេលនេះបានបើកលេងឡើងវិញយ៉ាងគគ្រឹកគគ្រេង ដោយមានសុទ្ធសឹងតែជាជនជាតិខ្មែរចូលលេង ដោយមិនបារម្ភអ្វីទាំងអស់។
តាមសេចក្តីរាយការណ៍ថា ការបើកលេងឡើងវិញនេះ គឺមានរយៈពេលប៉ុន្មានខែមកហើយ ដោយអ្នកមកចូលលេងទៀតសោត មិនមានជនជាតិបរទេសនោះទេ ដោយភាគច្រើនគេឃើញសុទ្ធសឹងតែជនជាតិខ្មែរដែលច្បាប់ហាមឃាត់ ហើយពេលខ្លះ គេឃើញមានទាំងរថយន្តពាក់ស្លាកលេខនគរបាលចូលទៅលេងទៀតផង។
ទីតាំងជល់មាន់ស្ថិតក្នុងកាស៊ីណូក្បែរច្រកអន្តរជាតិភ្នំដិន
ចំពោះករណីនេះ លោក យុគ សារ៉ាត់ អធិការនគរបាលស្រុកគិរីវង់ បានថ្លែងថា កាស៊ីណូនោះគឺមានច្បាប់អនុញ្ញាត ហើយរយៈពេលកន្លងមក រាជរដ្ឋាភិបាលក៏បានប្រកាសឲ្យកាស៊ីណូបើកឡើងវិញ ក្រោយការធូរស្រាលពីវីរុសកូវីដ១៩ ដូច្នេះហើយទើបបានជាមានសកម្មភាពលេងឡើងវិញយ៉ាងដូចនេះ។
ចំពោះករណីដែលមានជនជាតិខ្មែរចូលលេងវិញ លោកអធិការបានថ្លែងថា លោកមិនបានដឹងទេ ព្រោះសូម្បីតែទៅក្បែរក៏លោកមិនហ៊ានទៅផង លុះត្រាតែមានបទល្មើសកើតឡើង ដោយកាស៊ីណូនោះគេប្រើសុទ្ធសឹងតែទាហានព្រំដែនការពារ ព្រមទាំងសន្តិសុខឯកជនរបស់គេ៕
រថយន្តពាក់ស្លាកលេខនគរបាល ចូលទៅលេងកាស៊ីណូ
រថយន្តពាក់ស្លាកលេខនគរបាល ដែលគេថតបាននៅក្នុងកាស៊ីណូ
