(ភ្នំពេញ)៖ លោក ឃួង ស្រេង អភិបាលរាជធានីភ្នំពេញ បានធ្វើការអំពាវនាវដល់បងប្អូនប្រជាពលរដ្ឋទាំងអស់ដែលកំពុងរងគ្រោះដោយទឹកជំនន់នៅភូមិសាស្រ្តផ្សារព្រែកជ្រៃ សូមចាកចេញពីលំនៅដ្ឋានមកកាន់ទីទួលសុវត្ថិភាព ដោយកុំនៅស្តាយទ្រព្យសម្បត្តិ។
តាមការបញ្ជាក់របស់លោកអភិបាលរាជធានី ពេលនេះ រដ្ឋបាលរាជធានីរៀបចំរោងតង់ សុំផ្ទះល្វែងគេ២ល្វែង ជូន ជាមូយនិងការឧបត្ថម្ភគ្រឿង ហូបចុកដូចជា ទឹក មីជាដើម។ ដូច្នេះសូមប្រជាពលរដ្ឋទាំងអស់ ចេញពីលំនៅដ្ឋានមកកាន់ទីទួលសុវត្ថិភាព ដោយកម្លាំងយើងជាអ្នកជួយដឹកជញ្ជូន ប្រកបដោយសុវត្ថិភាព បងប្អូនកុំស្តាយទ្រព្យសម្បត្តិ គិតពីអាយុជីវិតជាធំ។
នៅព្រឹកថ្ងៃ១៥តុលានេះ កំណាត់ផ្លូវចំការដូង២១៧ ក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ កំពុងគំរាមកំហែងដោយជំនន់ទឹកស្ទឹងព្រែកត្នោតនៅឡើយទេ។ បើតាមការបញ្ជាក់របស់អាជ្ញាធរ ប្រជាពលរដ្ឋរងគ្រោះនៅក្នុងតំបន់ខាងលើមានចំនួន២៨០០នាក់ ហើយ១យប់ពេញ យប់ម៉ិញនេះ កម្លាំងជម្លៀសប្រជាពលរដ្ឋបានជាង៥០០នាក់ ហើយព្រឹកនេះ បានបន្តសកម្មភាពជួយសង្គ្រោះបន្តទៀត៕
