បើតាមសេចក្តីរាយការណ៍បានឲ្យដឹងថា ក្នុងមួយថ្ងៃៗមានឡានដឹកខ្សាច់ ដែលដឹកចេញពីគីរីវង់ ឆ្លងកាត់ស្រុកទ្រាំង តាមបណ្តោយផ្លូវជាតិលេខ២ រាប់សិបគ្រឿងដោយមិនមានគ្របតង់ក្រណាត់អ្វីនោះឡើយ ដែលបណ្តាលឲ្យគ្រាប់ខ្សាច់ គ្រាប់ដីហុយជ្រុះពាសពេញផ្លូវ ធ្វើឲ្យប្រជាពលរដ្ឋពិបាកក្នុងការធ្វើដំណើរ ខណៈដែលពលរដ្ឋរស់នៅអមតាមដងផ្លូវក៏ត្រូវប៉ះពាល់ដល់សុខភាពផងដែរ។
តាមប្រជាពលរដ្ឋថា ឡានដឹកដីទាំងនោះ បើកប្រដេញគ្នាតាមដងផ្លូវដោយមិនខ្លាចមានគ្រោះថ្នាក់នោះឡើយ ហើយឡានក៏ពុំមានគ្របតង់អ្វីដែរ ដែលបណ្តាលឲ្យដីត្រូវកួចធ្លាក់មកលើផ្លូវជាតិ ហើយពេលដែលមានភ្លៀងធ្លាក់ក៏កើតមានជាការរអិលដល់អ្នកធ្វើដំណើរតាមផ្លូវ ហើយបើរាំងដីស្ងួតវិញ គឺហុយពេញផ្លូវតែម្តង។
ចំពោះករណីនេះ លោក ឃុត ភិន អធិការស្រុកទ្រាំង បានថ្លែងថា ចាំមើលស្រុកមានវិធានការយ៉ាងម៉េចលោកនឹងអនុវត្តតាម ព្រោះការអនុវត្តច្បាប់របស់សមត្ថកិច្ច ក៏ត្រូវមានការចូលរួមពីអាជ្ញាធរដែរ ហើយថា កន្លងមកលោកធ្លាប់លើកគោលការណ៍ដែរ ហើយលោកក៏មិនហ៊ានអនុវត្តដោយឯករាជ្យដែរ ទាល់តែមានគោលការណ៍ពីថ្នាក់លើទើបលោកអនុវត្ត៕
