ភ្នំពេញ៖ ក្រសួងការបរទេសកម្ពុជាបានប្រកាសនៅថ្ងៃរសៀលថ្ងៃតី៤ ខែវិច្ឆិកា នេះថា ក្រោយពីប្រទេសថៃបានធ្វើតេស្តរកឃើញថា រដ្ឋមន្រ្តីការបរទេស និងពាណិជ្ជកម្មហុងគ្រី ដែលបានមកបំពេញទស្សនកិច្ចផ្លូវការនៅកម្ពុជាកាលពីថ្ងៃទី៣ ខែវិច្ឆិកា មានវិជ្ជមានកូវីដ១៩ ឥឡូវនេះ រាជរដ្ឋាភិបាលបានសម្រេចឲ្យថ្នាក់ដឹកនាំ និងមន្រ្តីទាំងអស់ដែលជួប និងប្រាស្រ័យទាក់ទងផ្ទាល់ជាមួយប្រតិភូហុងគ្រី ត្រូវធ្វើតេស្តរកវីរុសកូវីដ១៩ និងដាក់ឲ្យនៅដាច់ដោយឡែក តាមការកំណត់របស់ក្រសួងសុខាភិបាល។
ពាក់ព័ន្ធនឹងការរកឃើញកូវីដ១៩ លើរដ្ឋមន្រ្តីការបរទេសហុងគ្រីនៅប្រទេសថៃនោះ ក្រសួងការបរទេសកម្ពុជាបានឲ្យដឹងថា សមាជិកគណៈប្រតិភូហុងគ្រីទាំងអស់ បានធ្វើតេស្ត និងមានវិញ្ញាបនបត្រសុខភាពបញ្ជាក់ថា គ្មានវីរុសកូវីដ១៩ទេ មុនពេលចេញដំណើរមកកម្ពុជា, ប៉ុន្តែនៅពេលដែលលោក និងប្រតិភូទៅដល់ទីក្រុងបាងកកនៅល្ងាចថ្ងៃទី៣ វិច្ឆិកា ការធ្វើតេស្តបានរកឃើញលោករដ្ឋមន្រ្តីការបរទេសហុងគ្រីមានវីរុសកូវីដ១៩៕
