(កំពត)៖ ក្រោយពីមានគណនីហ្វេសប៊ុកមួយឈ្មោះ Parith JB បានបង្ហោះសារនៅលើបណ្តាញសង្គម ដោយថា ប៉ូលិសខេត្តកំពតបានបាញ់មនុស្សស្លាប់ រួចដឹកសពទៅឲ្យដល់ផ្ទះ ហើយយកលុយមកសងជំងឺចិត្ត ៤៥០០ដុល្លារ ដើម្បីបញ្ចប់រឿងនោះ ឥឡូវនេះ ស្នងការនគរបាលខេត្តកំពតបានចេញលិខិតបំភ្លឺចំពោះករណីនេះហើយ។
ស្នងការនគរបាលខេត្តកំពតបានបញ្ជាក់ថា រឿងរ៉ាវនេះ បានកើតឡើងកាលពីវេលាម៉ោងប្រមាណ៩យប់ ថ្ងៃទី២ ខែវិច្ឆិកា ឆ្នាំ២០២០ ដោយដំបូងមានជនល្មើសចំនួន ៥នាក់ ១-ឈ្មោះ ម៉ម វិបុល ភេទប្រុស អាយុ២៩ឆ្នាំ(ស្លាប់), ២-ឈ្មោះ ធម្ម កុម្ភៈ ភេទប្រុស អាយុ១៦ឆ្នាំ (ឃាត់ខ្លួនបាន), ៣-ឈ្មោះ ម៉ាត់ សើគីរីន ភេទប្រុស អាយុ១៧ឆ្នាំ, ៤-ឈ្មោះ សុខ ធា ភេទប្រុស អាយុ១៧ឆ្នាំ និង៥-ឈ្មោះ រ៉ាន់ ភេទប្រុស អាយុជាង ២០ឆ្នាំ បានជិះម៉ូតូ២គ្រឿង ដោយកាប់ឈ្មោះ តឿ ចាន់ ភេទប្រុស អាយុ១៧ឆ្នាំ ទីលំនៅភូមិស្វាយធំ សង្កាត់ក្រាំងអំពិល ក្រុងកំពត ខេត្តកំពត នៅចំណុចក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត បណ្តាលឲ្យរងរបួសក្បាលជាទម្ងន់ ក្រោយពីជនរងគ្រោះផឹកកាហ្វេនៅតុក្បែរជនសង្ស័យ ហើយមើលមុខជនសង្ស័យ ទើបធ្វើឲ្យជនសង្ស័យខឹងក៏តាមកាប់ជនរងគ្រោះ។
ក្រោយពេលកើតហេតុកម្លាំងអធិការដ្ឋាននគបាលក្រុងកំពត បានចុះដល់កន្លែងកើតហេតុ ប្រមូលព័ត៌មាន និងពង្រាយកម្លាំងតាមដងផ្លូវស្ទាក់ឃាត់ក្រុមជនសង្ស័យ។ ភ្លាមៗ នោះកម្លាំងសមត្ថកិច្ចបានឃាត់ម៉ូតូ០១គ្រឿងមានគ្នា ០២នាក់ ប៉ុន្តែជនសង្ស័យមិនព្រមឈប់ហើយថែម ទាំងបើកបំបុកកម្លាំងសមត្ថកិច្ចរងរបូសចំនួន ០២នាក់។ ដោយឃើញស្ថានភាពបែបនេះ កម្លាំងសមត្ថកិច្ចដ៏ទៃទៀត ក៏បានផ្ទះអាវុធផ្ចុចដីដើម្បីឲ្យឈប់ បណ្តាលឲ្យផ្លាតត្រូវជនសង្ស័យ ០១នាក់ស្លាប់នៅពេលដែលបញ្ជូនទៅដល់មន្ទីរពេទ្យ និងឃាត់ខ្លួនគូកនបាន១នាក់ ។
ស្នងការនគរបាលខេត្តកំពតបានអះអាងថា សកម្មភាពរបស់កងកម្លាំងខាងលើនេះ ស្របតាមខ្លឹមសារមាត្រា ៣១ រហូតដល់ មាត្រា ៣៧ ក្រមព្រហ្មទណ្ឌ នៃព្រះរាជាណាចក្រកម្ពុជា ។ ប៉ុន្តែទោះជាយ៉ាងនេះក្តី ស្នងការដ្ឋាននគរបាលខេត្តកំពត ក៏បានឃាត់ខ្លួនមន្ត្រីនគរបាលចំនួន ០៣នាក់ ដែលបង្កឲ្យផ្ទះអាវុធបណ្តាលឲ្យជនសង្ស័យស្លាប់ ដើម្បីអនុវត្តវិន័យរបស់កងកម្លាំងនគរបាលជាតិ និងកសាងសំណុំរឿងបញ្ជូនទៅតុលាការ។
ក្រៅពីនេះ ក្នុងទឹកចិត្តប្រកបដោយមនុស្សធម៌ និងចូលរួមរំលែកទុក្ខជាមួយក្រុមគ្រួសារ នៃសព ស្នងការនគរបាលខេត្តកំពត ក៏បាននាំយកថវិកាចំនួន ៤៥០០ដុល្លារ ប្រគល់ជូនក្រុមគ្រួសារសពសម្រាប់ចាត់ចែងធ្វើបុណ្យតាមប្រពៃណី៕