សេចក្តីរាយការណ៍ពីប្រជាពលរដ្ឋបានឲ្យដឹងថា ដីរដ្ឋចំនួន១២ហិកតា ស្ថិតនៅភូមិដើមផ្ដៀក ឃុំព្រៃស្លឹក ស្រុកទ្រាំង ខេត្តតាកែវ ត្រូវគេឃុបឃិតគ្នារៀបចំលក់ទៅឲ្យអ្នកមានលុយម្នាក់នៅផ្សារព្រៃសណ្តែក ក្នុងតម្លៃជិត៤០ម៉ឺនដុល្លារ។
ពលរដ្ឋថា ក្នុងរយៈពេលជិតមួយឆ្នាំមកហើយ ពួកគាត់ឃើញមានទាំងក្រុមអាជ្ញាធរ មានទាំងក្រុមមេព្រៃ បាននាំគ្នាចុះមកដល់ទីតាំងដី១២ហិកតានោះដោយសភាពស្ងាត់ៗ និងអាថ៌កំបាំងបំផុត ក្រោយមកទើបមានការបែកធ្លាយថា គេមកនោះដើម្បីរៀបចំលក់ដីរដ្ឋ១២ហិកតាខាងលើ។
ពាក់ពន្ធ័ករណីខាងលើនេះ លោក ព្រំ ណែត មេឃុំព្រៃស្លឹកបានថ្លែងថា លោកមិនបានដឹងរឿងដីនេះទេ លោកថា ដីនោះគ្មានប្លង់កម្មសិទ្ធ ដែលជាដីរបស់រដ្ឋ ដូច្នេះលោកមិនដឹងរឿងអីទាំងអស់ ហើយក៏មិនបានចូលរួមលក់ដីរដ្ឋដែរ។
សម្រាប់ លោក ញឹប ស្រ៊ន ប្រធានមន្ទីរកសិកម្មខេត្តតាកែវ បានថ្លែងថា តើអ្នកណាថ្លើមធំហ៊ានលក់ដីរដ្ឋ ? លោកថា ដីនៅចំនុចខាងលើគឺស្ថិតក្រោមការគ្រប់គ្រងដោយរដ្ឋបាលព្រៃឈើ ដូច្នេះ លោកស្នើឲ្យទៅសួរទៅលោក ស៊ឹម ល្បាប៉ាំង នាយខណ្ឌ័រដ្ឋព្រៃឈើវិញល្អជាង។
លោក ស៊ឹម ឡាប៉ាំង នាយខណ្ឌ័រដ្ឋបាលព្រៃឈើតាកែវក្រោយដឹងថា សារព័ត៌មានសួនាំរឿងដីរដ្ឋ១២ហិកតានោះ លោកប្រាប់ថា លោកកំពុងចូលដេកពេទ្យ។
ចំណែកលោក នួន សុធា ប្រធានមន្ទីរសុរិយោដីខេត្តតាកែវវិញបានថ្លែងថា លោកអត់ដឹងរឿងដីនោះទេ សូមអ្នកសារព័ត៌មានសួរទៅប្រធានការិយាល័យភូមិបាលស្រុកទ្រាំងវិញទៅ៕