ព្រះសីហនុ – ហេដ្ឋារចនាសម្ព័ន្ធផ្លូវ៣៤ខ្សែនៅក្នុងខេត្តព្រះសីហនុ ចាប់ផ្តើមដំណើរការអ៊ុតបេទីមហើយនៅថ្ងៃទី២ ខែធ្នូនេះ ដោយមានការចុះពិនិត្យដោយផ្ទាល់ពីលោក លោក ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណ:កម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។
គួរបញ្ជាក់ថា ការអ៊ុតកៅស៊ូបេទីមីន័រនេះ គឺមានកម្រាស់ ០.០៧ ម៉ែត្រ បន្ថែមពីលើបេតុង ដែលបានចាក់រួចកម្រាស់០.២៥ម៉ែត្រ ហើយជាជំហានដំបូងនេះក្រុមការងារនឹងធ្វើការអ៊ុតបេទីមលើខ្សែផ្លូវធំៗជាមុន និងបន្តទៅខ្សែផ្លូវផ្សេង ទៀតតាមផែនការ និងពេលវេលាដែលបានគ្រោងទុក។
ក្រុមហ៊ុនស្ថាបនាផ្លូវ និងក្រុមហ៊ុនអ៊ុតបេទីមនឹងសហការគ្នាដើម្បីឲ្យដំណើរការស្ថាបនា និងអ៊ុតបេទីមធានាបាននូវបរិមាណ គុណភាព និងសោភ័ណ្ឌភាព ហើយក្រុមហ៊ុនបញ្ជាក់ថា ខ្លួននឹងប្រើពេលវេលា ៩០ថ្ងៃ ដោយគ្រោងនឹងបញ្ចប់នៅចុងខែកុម្ភះ ឬដើមខែមីនា ឆ្នាំ ២០២១ ខាងមុខ៕