តាកែវ – យោងតាមរបាយការណ៍របស់សមត្ថកិច្ចបានឲ្យដឹងថា នៅវេលាម៉ោង៥ព្រឹក ថ្ងៃទី៣ ខែធ្នូ ឆ្នាំ២០២០នេះ កម្លាំងប៉ុស្តិ៍នគរបាលរដ្ឋបាលឃុំគោកព្រេច បានចេញល្បាត រួចក៏ប្រទះឃើញមនុស្ស២នាក់បានដឹកញ្ឆាស្រស់ នៅចំណុចភូមិចំបក់ ស្ថិតក្នុងឃុំគោកព្រេច ស្រុកគិរីវង់ ខេត្តតាកែវ។
ជនសង្ស័យជួញដូរកញ្ឆាដែលសមត្ថកិច្ចស្រុកគិរីវង់ឃាត់ខ្លួន
មនុស្សទាំង២នាក់ដែលសមត្ថកិច្ចឃាត់ខ្លួននោះ ត្រូវបញ្ជាក់ថា ទី១.ឈ្មោះអិន ឡង់ឌីវិថេន ភេទប្រុស អាយុ២៤ឆ្នាំ រស់នៅភូមិក្បាលដំរី ឃុំគោកព្រេច ស្រុកគិរីវង់ ខេត្តតាកែវ និងទី២.ឈ្មោះផល ភេន ភេទប្រុស អាយុ២៤ឆ្នាំ នៅភូមិដើមរំដែល ឃុំ សោម ស្រុកគិរីវង់ ខេត្តតាកែវ។
ចំណែកវត្ថុតាងដែលសមត្ថកិច្ចរឹបអូសបានរួមមាន៖ កញ្ឆាស្រស់ ទម្ងន់ ៣,២ kg ម៉ូតូ០១គ្រឿងម៉ាកឌ្រីម ស៊េរី២០១៧ពណ៍ខ្មៅ ពាក់ស្លាកលេខ តាកែវ 1Q-6154 ដាវសាំប៉ូរ៉ៃ០១ និងកាំភ្លើងកៃច្នៃ១ដើម។
បច្ចុប្បន្នកម្លាំងជំនាញកំពុងកសាងសំណុំរឿងចាត់ការទៅតាមនិតិវិធី។
គួរបញ្ជាក់ដែរថា នៅស្រុកគិរីវង់តែងតែកើតមាននូវករណីលួចលាក់ដាំដំណាំកញ្ឆា ហើយសមត្ថកិច្ចតែងចុះធ្វើការបង្រ្កាបជាច្រើនលើកច្រើនសារ ប៉ុន្តែការបង្រ្កាបនោះមិនចេះអស់ទាល់តែសោះ ពោលគឺនៅតែមានការលួចលាក់ដាំជាបន្តបន្ទាប់ ហើយគេកម្រនឹងចាប់បានអ្នកដាំនោះណាស់៕
