តាកែវ – សេចក្តីរាយការណ៍របស់ប្រជាពលរដ្ឋរស់នៅភូមិរំលក ឃុំបាស្រែ ស្រុកអង្គរបូរី បានឲ្យដឹងថា កាលពីយប់មិញនេះ ឈ្មួញពីរនាក់ប្តីប្រពន្ធដែលមានឈ្មោះ ប៉ុល សំអាត និង ស៊ឹក គឹមឡេង បានដឹកសត្វទារចំនួនរហូតដល់ទៅ ២ពាន់ក្បាលយកមកដាក់នៅដីកណ្តាលភូមិដើម្បីចិញ្ចឹមយកពង ខណៈដែលការចិញ្ចឹមនោះ ត្រូវបានពលរដ្ឋរស់នៅជិតខាងធ្វើការជំទាស់ និងឈានរហូតដល់ការហាមឃាត់ពីអាជ្ញាធរឃុំកាលពីប៉ុន្មានខែមុនហើយក្តី។
សត្វទា២ពាន់ក្បាល ត្រូវគេលួចដឹកយកមកដាក់កណ្តាលភូមិ
កាលពីខែតុលា ខណៈដែលឈ្មួញពីរនាក់ប្តីប្រពន្ធនោះរៀបចំដី និងធ្វើរោងដើម្បីចិញ្ចឹមនោះ មានប្រជាពលរដ្ឋមិនតិចគ្រួសារទេបានធ្វើការជំទាស់ រហូតដល់មានការដាក់ពាក្យបណ្តឹងទៅអាជ្ញាធរ ព្រោះការចិញ្ចឹមនោះធ្លាប់មានរឿងរ៉ាវម្តងរួចហើយដែលធ្វើឲ្យប៉ះពាល់ដល់បរិស្ថានរស់នៅរបស់បងប្អូនប្រជាពលរដ្ឋ ការសិក្សារបស់សិស្ស ព្រមទាំងទីវត្តអារាមដែលនៅក្បែរនោះ។
ក្រោយពីមានពាក្យបណ្តឹងនោះ អាជ្ញាធរឃុំបាស្រែ ក៏បានហៅឈ្មួញទាំងពីរនាក់នេះទៅនិយាយ ដោយប្រាប់ថា មិនអាចមានការចិញ្ចឹមសត្វទារនៅកណ្តាលភូមិបាននោះទេ ព្រោះតែវាប៉ះពាល់ដល់បរិស្ថានធ្ងន់ធ្ងរ តែមិនដឹងយ៉ាងម៉េច ស្រាប់តែនៅដើមខែធ្នូនេះ ឈ្មួញទាំងពីរនាក់ប្តីប្រពន្ធ ស្រាប់តែដឹកសត្វទារដល់ទៅ២ពាន់ក្បាលយកមកដាក់កណ្តាលភូមិធ្វើមិនដឹង ដោយមិនស្តាប់ទាំងការណែនាំរបស់អាជ្ញាធរយ៉ាងដូច្នេះ។
–
ចំពោះករណីនេះ លោក ឌឹម គឹមសាន្ត អភិបាលស្រុកអង្គរបូរីបានថ្លែងថា លោកមិនទាន់ដឹងពីករណីនេះទេ ដោយខាងអាជ្ញាធរឃុំនៅមិនទាន់បានរាយការណ៍មកលោកនៅឡើយ ហើយថា ចាំលោកឲ្យមន្រ្តីជំនាញចុះទៅធ្វើការពិនិត្យ។
យ៉ាងណាក៏ដោយ ប្រជាពលរដ្ឋរស់នៅក្នុងភូមិភូមិរំលក ឃុំបាស្រែ ស្នើដល់អាជ្ញាធរសូមមានចំណាត់ការឲ្យបានលឿនបន្តិច ព្រោះថា ពេលនេះ ពលរដ្ឋរស់នៅក្នុងភូមិចាប់ផ្តើមមានបញ្ហាចំពោះក្លិនស្អុយដែលកើតចេញពីកន្លែងចិញ្ចឹមទារនោះជាបណ្តើរៗហើយ ហើយមិនយូរប៉ុន្មានទេពួកគាត់អាចជួបនូវបញ្ហាសុខភាពហើយ៕
