ព្រះសីហនុ – ក្នុងឱកាសអញ្ជើញពិនិត្យមើលសកម្មភាពស្ថាបនាផ្លុវលេខ១១២២តភ្ជាប់ពីផ្លូវលេខ១១២ (សេតេ) មកកាន់ចុងផ្លូវលេខ៨០០ ស្ថិតក្នុងសង្កាត់លេខ២ ក្រុងព្រះសីហនុ និងបន្តចុះពិនិត្យសកម្មភាពអ៊ុតប៉េទីម នៅលើផ្លូវពូឡូវ៉ៃ ផ្លូវលេខ៣០០ ស្ថិតក្នុងសង្កាត់លេខ៤ ក្រុងព្រះសីហនុ នៅព្រឹកថ្ងៃទី១១ ខែធ្នុ ឆ្នាំ២០២០នេះ លោក គួច ចំរើន អភិបាល នៃគណៈអភិបាលខេត្តព្រះសីហនុ បានធ្វើការណែនាំទៅក្រុមការងារអ៊ុតបេទីម ត្រូវយកចិត្តទុកដាក់អនុវត្តតាមស្តង់ដា ឲ្យមានគុណភាពល្អ និងសោភ័ណភាព តាមលក្ខណៈបច្ចេកទេស។
លោកថា នេះគឺជាគម្រោងថវិការបស់រាជរដ្ឋាភិបាលកម្ពុជា ដូច្នេះត្រូវតែយកចិត្តទុកដាក់ដើម្បីធានាការប្រើប្រាស់បានយូរអង្វែង សម្រាប់ការធ្វើដំណើររបស់បងប្អូនប្រជាពលរដ្ឋ អ្នកវិនិយោគ ភ្ញៀវទេសចរជាតិ អន្តរជាតិមកលេងកំសាន្តនៅក្នុងខេត្តព្រះសីហនុ។
សូមបញ្ជាក់ផងដែរ ចំពោះការចាក់អ៊ុតបេទីមនេះ គឺមានក្រុមហ៊ុនចំនួន៣បានអនុវត្ត ដោយនឹងប្រើពេលវេលារយៈពេល៩០ថ្ងៃ ដោយគ្រោងនឹងបញ្ចប់នៅចុងខែកុម្ភ: ឬដើមខែមីនា ឆ្នាំ២០២១ ខាងមុខ៕