រដ្ឋមន្ត្រីក្រសួងមហាផ្ទៃអាល្លឺម៉ង់ លោក Horst Seehofer បានឲ្យដឹងថា អធិការបតី Agela Merkel បានខឹងសម្បាយ៉ាងខ្លាំង ដោយកោះប្រជុំជាបន្ទាន់ នៅថ្ងៃទី១៦ ខែមីនានេះ បន្ទាប់ពីទទួលបានព័ត៌មានមកថា ក្រុមហ៊ុនផលិតឱសថ CureVac បានព្រមព្រៀងលក់ផ្តាច់មុខនូវថ្នាំប្រឆាំងនឹងកូវីដ-១៩ ទៅឲ្យអាមេរិក។
លោក Horst Seehofer បានបញ្ជាក់ថា កូវីដ-១៩ មិនត្រឹមតែបង្កឲ្យជាវិបត្តិសុខាភិបាលសាធារណៈនោះឡើយ ប៉ុន្ដែវាថែមទាំងបង្កើតនូវបញ្ហាសន្តិសុខជាតិបន្ថែមពីលើនេះបន្ដទៀត។ លោកបន្តទៀតថា រដ្ឋាភិបាលត្រូវធានាដល់ស្បៀងអាហារ និងថ្នាំព្យាបាលទៀតផង ដោយមិនត្រូវលក់សិទ្ធិផ្តាច់មុខ នាពេលនេះឡើយ។
សារព័ត៌មាន Die Welt បានផ្សាយថា លោក ត្រាំ បានចំណាយប្រាក់១ពាន់លានដុល្លារទិញវ៉ាក់សំាង ផ្តាច់មុខពីក្រុមហ៊ុនអាល្លឺម៉ង់។ សារព័ត៌មាននេះបានដកស្រង់ប្រភពដែលមិនបញ្ចេញឈ្មោះ បានបញ្ជាក់ថា វ៉ាក់សាំងប្រឆាំងនឹងកូវីដ-១៩ ផលិតសម្រាប់តែអាមេរិកប៉ុណ្ណោះ ហើយក៏មិនអាចចែកចាយទៅឲ្យប្រទេសផ្សេង សូម្បីតែអាល្លឺម៉ង់ដែរ។
កាលពីថ្ងៃទី២ ខែមីនា ប្រធានក្រុមហ៊ុនផលិតឱសថ CureVac លោក Daniel Menichella បានទៅកាន់សេតវិមាន ជួបពិភាគ្សាជាមួយប្រធានាធិបតី ដូណាល់ ត្រាំ និងអនុប្រធានាធិបតី Mike Pence។ ប៉ុន្តែអ្នកនាំពាក្យសេតវិមានបានច្រានចោលការលើកឡើងខាងលើ ដែលថា អាមេរិកបានទិញផ្តាច់មុខនូវវ៉ាក់សាំងពីអាល្លឺម៉ង់៕