តាកែវ – ក្រោយពីមានការមិនពេញចិត្តពីប្រជាពលរដ្ឋ ចំពោះចំណាត់ការរបស់លោក រស់ រ័ត្ន អភិបាលរងស្រុកអង្គរបូរី ដែលបានដឹកនាំកម្លាំងវាយកម្ទេចរបងផ្ទះប្រជាពលរដ្ឋដែលក្រីក្រនៅតាមដងផ្លូវចំណុចភូមិព្រៃផ្គាំ ឃុំព្រៃផ្គាំ ស្រុកអង្គរបូរី រួចទុកផ្ទះថ្ម និងផ្ទះអ្នកមានលុយមួយអន្លើនោះ, លោក អ៊ូច ភា អភិបាលខេត្តតាកែវបានថ្លែងថា ជាគោលការណ៍ អាជ្ញាធរត្រូវធ្វើទាំងអស់ ប៉ុន្តែអ្វីដែលមានពីមុនយូរហើយ គឺរក្សាទុកសិន។
លោកថា ការរក្សាទុកសិន គឺដើម្បីបន្តដោះស្រាយ និងហាមមិនឲ្យមានការលួចធ្វើថ្ម ឬសាងសង់ថ្មីនោះទេ ហើយបើមាន គឺត្រូវតែរុះរើ។
អភិបាលខេត្តតាកែវបានបញ្ជាក់ថា បើមិនធ្វើអញ្ចឹងទេ នោះគេនឹងនាំគ្នាធ្វើគ្រប់គ្នា ហើយភាពអនាធិបតេយ្យនឹងកើតមានឡើង។
គួរបញ្ជាក់ថា កាលពីថ្ងៃទី១៥ ខែធ្នូ ឆ្នាំ២០២០កន្លងទៅនេះ ក្រុមអាជ្ញាធរដែលដឹកនាំដោយលោក រស់ រ័ត្ន អភិបាលរងស្រុកអង្គរបូរី បានចុះមកកាន់ចំណុចភូមិព្រៃផ្គាំ ឃុំព្រៃផ្គាំ ស្រុកអង្គរបូរី រួចធ្វើការវាយរបងផ្ទះ និងរោងលក់ស៊ុបរបស់អ្នកស្រី សុខ ឡុញ ដែលគាត់មានជីវភាពក្រីក្រ រស់ពឹងលើកន្លែងលក់ស៊ុបនោះ ខណៈផ្ទះថ្មដែលជាសាច់ញាតិរបស់មេភូមិ និងមេឃុំ ស្ថិតនៅតាមបណ្តោយផ្លូវនោះ មិនត្រូវបានវាយកម្ទេចនោះទេ។
អ្នកស្រី សុខ ឡុញ ដែលមានអាយុជិត៦០ឆ្នាំទៅហើយបានថ្លែងថា នៅថ្ងៃនោះ គ្រាន់តែចុះមកដល់រោងគាត់ភ្លាម លោក រស់ រ័ត្ន បានទាញញញួរចូលទៅវាយរបង និងលូរបង្គន់គាត់ភ្លាមៗ ដោយហាក់បីដូចជាមានគំនុំជាមួយគាត់ពីពេលណាមកអញ្ចឹង។ អ្នកស្រី សុខ ឡុញ បានបញ្ជាក់ថា គាត់បានសង់រោងស្នាក់នៅលក់ដូរចិញ្ជឹមជីវិតនៅតាមចំណីផ្លូវនេះ ក៏ព្រោះតែគាត់គ្មានកន្លែងនៅ ហើយបើរដ្ឋត្រូវការពេលណា គាត់ជូនពេលនោះឲ្យតែធ្វើស្មើភាពគ្នា ព្រោះថា នៅជិតៗគាត់គេសង់សុទ្ធតែផ្ទះថ្មធំៗនៅតាមចំណីផ្លូវដូចគ្នា ចម្លែកអីតែគាត់ជាអ្នកក្រីក្រត្រូវអាជ្ញាធរចុះមកវាយកម្ទេច តែផ្ទះថ្មនៅក្បែរគាត់គេមិនវាយកម្ទេចទេ ពោលគឺគេធ្វើបាបតែរាស្រ្តីក្រីក្រគ្មានលទ្ធភាពតែប៉ុណ្ណោះ៕