(ភ្នំពេញ) – ក្នុងសារលិខិតអបអរ លោក ចូ បៃឌិន ដែលបានជាប់ឆ្នោតជាប្រធានាធិបតីសហរដ្ឋអាមេរិកទី៤៦ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានលើកឡើងថា រាជរដ្ឋាភិបាល និងប្រជាជនកម្ពុជា តែងតែផ្តល់សារសំខាន់យ៉ាងធំធេងដល់ ការពង្រឹង និងពង្រីកនូវទំនាក់ទំនងជាមិត្តភាពដ៏យូរអង្វែងរវាងប្រទេសទាំងពីរ ដែលនៅក្នុងឆ្នាំនេះ យើងកំពុងតែប្រារព្ធខួបលើកទី៧០។
ក្នុងនោះ សម្តេចបានបញ្ជាក់ថា “រាជរដ្ឋាភិបាលរបស់ខ្ញុំបានប្តេជ្ញាចិត្តយ៉ាងពេញលេញ ក្នុងការធ្វើការងារជាមួយរដ្ឋបាលរបស់ឯកឧត្តម ដើម្បីជំរុញទំនាក់ទំនងទ្វេភាគីឱ្យកាន់តែល្អ ប្រសើរបន្ថែមទៀត”។
សូមបញ្ជាក់ថា លោក ចូ បៃដិន ត្រូវបានអង្គបោះឆ្នោតនៅសហរដ្ឋអាមេរិក កាលពីថ្ងៃទី១៤ ខែធ្នូ ឆ្នាំ២០២០ កន្លងទៅនេះ ទទួលស្គាល់ជាផ្លូវការលើជ័យជម្នះរបស់លោក ដែលធ្វើឲ្យលោកក្លាយជាប្រធានាធិបតីថ្មី របស់សហរដ្ឋអាមេរិក៕