(តាកែវ) – លោក ឌឹម គឹមសាន្ត អភិបាលស្រុកអង្គរបូរី បានថ្លែងថា លោកនឹងធ្វើការស៊ើបអង្កេត ពាក់ព័ន្ធនឹងករណីកូនចៅក្រោមបង្គាប់របស់លោក ដែលបានប្រព្រឹត្តអំពើពុករលួយយកលុយពីក្រុមគ្រឿងចក្រកាយដី។
សូមបញ្ជាក់ថា កាលពីពេលថ្មីៗនេះ ក្រុមគ្រឿងចក្រកាយដីនៅភូមិសាស្រ្តស្រុកអង្គរបូរីបានថ្លែងថា ពួកគេបានចំណាយប្រាក់ទាំងលើតុ និងក្រោមតុ ឲ្យទៅអាជ្ញាធរស្រុកអង្គរបូរី មុននឹងចាប់ផ្តើមអាជីវកម្មរបស់ខ្លួន ប៉ុន្តែអាជ្ញាធរស្រុកនេះ នៅតែធ្វើទុក្ខបុកម្នេញពួកគេ ដោយទៅចាប់គ្រឿងចក្រថែមទៀត។
ក្រុមគ្រឿងចក្រដឹកដីទាំងនោះនិយាយថា ពួកគេបានចំណាយលុយសុំច្បាប់ទៅសាលាស្រុកតាមរយៈច្រកចេញចូលតែមួយអស់ចំនួន ៣០ម៉ឺនរៀល សម្រាប់ការកាយដី ហើយក៏បានចំណាយទៅឲ្យលោក រស់ រ័ត្ន អភិបាលរងស្រុកអង្គរបូរីចំនួន ៤០ម៉ឺនរៀល ព្រមទាំងលោក ឌឿ ជា អភិបាលរងស្រុក និងលោក ឡេង ខូវ ប្រធានការិយាល័យភូមិបាលស្រុក ចំនួន ២៥ម៉ឺនរៀលថែមទៀត, ប៉ុន្តែក្រោយមក ក្រុមអាជ្ញាធរនៅតែទៅហាមឃាត់គ្រឿងចក្ររបស់ពួកគេមិនឲ្យកាយដដែល។
ក្រោយពីមានការបែកធ្លាយនូវរឿងរ៉ាវនេះ តាមសេចក្តីរាយការណ៍ថា លោក រស់ រ័ត្ន អភិបាលរងស្រុកអង្គរបូរី បានយកលុយចំនួន ៤០ម៉ឺនរៀលដែលពុករលួយនោះ ទៅឲ្យម្ចាស់គ្រឿងចក្រវិញ។
យ៉ាងណាក៏ដោយ គេរំពឹងថា អភិបាលស្រុកអង្គរបូរី នឹងធ្វើការស៊ើបអង្កេតករណីនេះ ដោយមិនលម្អៀង កុំឲ្យមន្រ្តីក្រោមបង្គាប់ប្រព្រឹត្តអំពើពុករលួយតាមទំនើងចិត្ត ធ្វើឲ្យបាត់ទំនុកចិត្តពីប្រជាពលរដ្ឋ៕