(ភ្នំពេញ)៖ ក្រោយពីមានការរកឃើញនូវអ្នកមានផ្ទុកមេរោគកូវីដ១៩ ជាបន្តបន្ទាប់នៅកម្ពុជា ក្រសួងសុខាភិបាលបានសម្រេចប្រើប្រាស់សណ្ឋាគារ Great DUKE (អតីតសណ្ឋាការអាំងទែកុងទីណង់តាល់) ជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ១៩។
គួរបញ្ជាក់ថា នៅព្រឹកមិញ ក្រសួងសុខាភិបាលកម្ពុជា បានប្រកាសថា ខ្លួនបានរកឃើញវិជ្ជមានជំងឺកូវីដ១៩ ទៅលើមនុស្ស១២នាក់បន្ថែមទៀតនៅកម្ពុជា ដោយ២ករណីនៅខេត្តបន្ទាយមានជ័យ កើតទៅលើជនជាតិខ្មែរឥស្លាម និងបុរសជនជាតិខ្មែរត្រឡប់មកពីប្រទេសថៃ, រាជធានីភ្នំពេញ២ករណី កើតទៅបុរសខ្មែរឥស្លាមនៅព្រែកប្រា, ខេត្តកំពង់ឆ្នាំង២ករណី កើតទៅបុរសខ្មែរឥស្លាម២នាក់, បាត់ដំបង ៤ករណី កើតទៅលើបុរសខ្មែរឥស្លាម, ខេត្តកំពត ១ករណី កើតទៅលើបុរសខ្មែរឥស្លាម និង ខេត្តត្បូងឃ្មុំ ១ករណី កើតទៅលើបុរសខ្មែរឥស្លាម។
បុរសជនជាតិខ្មែរឥស្លាមទាំង១១នាក់ខាងលើ គឺអ្នកក្នុងចំណោមអ្នកដែលបានវិលត្រឡប់មកពីការចូលរួមពិធីសាសនានៅប្រទេសម៉ាឡេស៊ីចំនួន ៧៩នាក់។
យ៉ាងណាក៏ដោយ ចំពោះមុខស្ថានភាពនេះ ក្រសួងសុខាភិបាលបានស្នើដល់ប្រជាពលរដ្ឋទាំងអស់ សូមរក្សាភាពនឹងនរក្នុងចិត្ត ដោយកុំមានការភ័យខ្លាច ហើយជឿទុកចិត្តលើវិធានការប្រយុទ្ធនឹងជំងឺកូវីដ១៩ របស់រាជរដ្ឋាភិបាល៕
