(ភ្នំពេញ) – អគ្គលេខាធិការដ្ឋានរដ្ឋសភាបានជូនដំណឹងថា នៅថ្ងៃអង្គារ ទី២៩ ខែធ្នូ ឆ្នាំ២០២០សប្តាហ៍ក្រោយនេះ រដ្ឋសភានឹងបន្តសម័យប្រជុំលើកទី៥ នីតិកាលទី៦ ដើម្បីសម្រេច និងបោះឆ្នោតទៅលើរបៀបវារៈចំនួន២។
សម្តេច ហេង សំរិន ប្រធានរដ្ឋសភា ដឹកនាំកិច្ចប្រជុំកាលពីព្រឹកមិញ
ក្នុងនោះ គឺការប្រកាសសុពលនៃអាណត្តិតំណាងរាស្រ្តទំាងពីររូប មានឯកឧត្តម លី ស៊ុគ្រី ជាតំណាងរាស្រ្តថ្មីមណ្ឌលខេត្តតាកែវ ជំនួសឯកឧត្តម សុខ សូកាន ដែលបានសុំលាលែង និងឯកឧត្តម សៅ ស៉ារ៉ាត់ ជាតំណាងរាស្រ្តថ្មីមណ្ឌលខេត្តប៉ៃលិន ជំនួស លោកជំទាវ បាន ស្រីមុំ ដែលបានលាលែង និងរៀបចំបោះឆ្នោតជ្រើសតំាង ឯកឧត្តម ខៀវ ភារិទ្ធ ជាសមាជិកគណៈកម្មការអបរំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ និងជ្រើសតំាងលោកជំទាវ នូ សុវណ្ណនី ជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ ផងដែរ៕
