(រតនគិរី) – យោងតាមពាក្យបណ្តឹងមួយច្បាប់ដាក់ទៅសាលាដំបូងខេត្តរតនគិរីបានបង្ហាញថា មន្ត្រីនគរបាលព្រហ្មទណ្ឌកំរិតស្រាលនៃស្នងការដ្ឋាននគបាលខេត្តខេត្តរតនគិរីឈ្មោះ ហេង គោរព បានប្តឹងលោក រុំ សារិទ្ធ អធិការរងនគរបាលស្រុកអូរជុំ ពីបទ «ប៉ុនប៉ងមនុស្សឃាតដោយចេតនា»។
លោក រុំ សារិទ្ធ អធិការរងស្រុកអូរជុំ និងលោក ហេង គោរព (ជនរងគ្រោះ) មន្ត្រីនគរបាលព្រហ្មទណ្ឌកំរិតស្រាលនៃស្នងការដ្ឋាននគបាលខេត្តខេត្តរតនគិរី
រឿងរ៉ាវនេះ បានកើតឡើងកាលពីវេលាម៉ោងប្រមាណ ១១និង៣០នាទីយប់ ថ្ងៃទី២០ ខែធ្នូ ឆ្នាំ២០២០ នៅចំណុចភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី ដោយលោក រុំ សារិទ្ធ បានយកកូនកាំបិតចិតបន្លែ ចាក់មកលើលោក ហេង គោរព ចំសៀតផ្កាខាងឆ្វេង បណ្តាលឲ្យបាក់ចុងកាំបិតជាប់ក្នុងសៀតផ្កាខាងឆ្វេង។
ប្រភពខ្លះបានឲ្យដឹងថា រឿងរ៉ាវដែលឈានដល់ការចាក់គ្នានេះ គឺដោយសារតែទំនាស់ពាក្យសម្តីក្នុងពេលផឹកសុីជុំគ្នានៅផ្ទះមិត្តភក្តិ ហើយពួកគេបាននិយាយទាក់ទឹនរឿងគុំនំយូរមកហើយ ធ្វើឲ្យមានកំហឹង ហើយដំបូងជនដៃដល់បានយកកំប៉ុងស្រាបៀមិនទាន់គាស់គប់ទៅលើជនរងគ្រោះមួយទំហឹង, ពេលនោះជនរងគ្រោះក៏ស្ទុះហក់ទៅបំណងតបត តែត្រូវជនដៃដល់ចាប់បានកូនកាំបិតស្ទុះចាក់ចំសៀតផ្កាបណ្តាលឲ្យបាក់ចុងជាប់កប់ក្នុងសាច់ហើយដួលទៅនិងដីបាត់មាត់បាត់ក រួចក៏ត្រូវគេជួយបញ្ជូនសង្គ្រោះភ្លាមៗដែរ។
ចំពោះករណីនេះ លោក យិន ចំណាន ស្នងការនគរបាលខេត្តរតនគិរីបានថ្លែងថា ខាងអង្គភាពបានចាត់ចែងតាមនីតិវិធីហើយ ក្នុងការសម្របសម្រួល៕
_
