(តាកែវ) – យោងតាមលិខិតមួយច្បាប់របស់រដ្ឋបាលស្រុកអង្គរបូរី ចុះថ្ងៃទី២៤ ខែធ្នូ ឆ្នាំ២០២០ បានប្រាប់ទៅឈ្មោះ ប៉ុល សំអាត ជាម្ចាស់កសិដ្ឋានចិញ្ចឹមទា ក្នុងភូមិរំលក ឃុំបាស្រែ ឲ្យធ្វើការផ្លាស់ប្តូរទីតាំងរបស់ខ្លួន ព្រោះទីតាំងចិញ្ចឹមទានេះ បានធ្វើឲ្យប៉ះពាល់ដល់បរិស្ថាន និងអ្នកជិតខាង។
កសិដ្ឋានចិញ្ចឹមទាដែលប៉ះពាល់បរិស្ថាន ស្ថិតនៅភូមិរំលក
លិខិតនោះ ក៏បានប្រាប់ឲ្យលោក ប៉ុល សំអាត ត្រូវបញ្ឈប់ការចិញ្ចឹមទានៅទីតាំងដែលមានផលប៉ះពាល់យ៉ាងយូរត្រឹមបំណាច់ខែមករា ឆ្នាំ២០២១។
ជាមួយគ្នានេះដែរ នៅពេលដែលប្តូរទីតាំងថ្មី ម្ចាស់កសិដ្ឋានក៏ត្រូវស្នើសុំមន្រ្តីជំនាញពិនិត្យ ផ្តល់យោបល់ និងមានការឯកភាពពីមន្រ្តីសមត្ថកិច្ចជំនាញផងដែរ។
សូមបញ្ជាក់ដែរថា បើតាមសេចក្តីរាយការណ៍ ឈ្មោះ ប៉ុល សំអាត នេះ មានកសិដ្ឋានចិញ្ចឹមទាជាច្រើនរោង ស្ថិតនៅក្នុងភូមិរំលកនេះ ដែលវាបាននិងកំពុងធ្វើឲ្យប៉ះពាល់ដល់បរិស្ថាន ក៏ដូចជាការរស់នៅរបស់បងប្អូនប្រជាពលរដ្ឋ៕
_
