(តាកែវ) – ប្រជាកសិកររស់នៅក្នុងភូមិរំលក នៃឃុំបាស្រែ ស្រុកអង្គរបូរី បានសម្តែងការក្តៅក្រហាយ ក្រោយពីផលស្រូវរបស់ពួកគាត់ត្រូវខូចខាត និងបំផ្លាញ ដោយសារតែទឹកអាចម៌ទា ដែលបង្ហូរចេញពីកសិដ្ឋានរបស់ក្រុមគ្រួសារលោក ប៉ុល សំអាត ដែលត្រូវបានពង្រាយនៅក្នុងភូមិនេះ។
កសិដ្ឋានចិញ្ចឹមទាដែលកំពុងបង្កផលប៉ះពាល់ដល់ប្រជាកសិករ
បើតាមប្រជាពលរដ្ឋថា លោក ប៉ុល សំអាត គឺជាឈ្មួញរកស៊ីចិញ្ចឹមទា ហើយគាត់មានរោងទាជាច្រើន ដោយដាក់ពង្រាយនៅក្នុងភូមិរំលកនេះ ហើយរោងទាមួយក្នុងចំណោមរោងទាផ្សេងទៀត ត្រូវបានរដ្ឋបាលស្រុកអង្គរបូរី ចេញបញ្ជាឲ្យធ្វើការប្តូរទីតាំង ក្រោយពីវាបានប៉ះពាល់ដល់រស់នៅជិតខាង។ ហើយឥឡូវនេះ រោងទាផ្សេងទៀតរបស់ឈ្មោះ ប៉ុល សំអាត ដែលនៅក្រៅភូមិ ក៏បានបង្កផលប៉ះពាល់ដល់ប្រជាពលរដ្ឋផងដែរ ដោយវាកំពុងបំផ្លាញផលស្រូវរបស់បងប្អូនប្រជាពលរដ្ឋ ដែលមានដីស្រែស្ថិតនៅក្បែរៗកសិដ្ឋានទាំងនោះ។
យ៉ាងណាក៏ដោយ ប្រជាពលរដ្ឋរំពឹងថា អាជ្ញាធរមូលដ្ឋាននឹងពិនិត្យមើលឡើងវិញចំពោះកសិដ្ឋានចិញ្ចឹមទា ស្ថិតនៅក្នុងភូមិរំលកនេះ ដែលកំពុងប៉ះពាល់ដល់ប្រជាពលរដ្ឋ។
សូមបញ្ជាក់ថា កាលពីពេលថ្មីៗនេះ រដ្ឋបាលស្រុកអង្គរបូរី បានចេញលិខិតមួយច្បាប់ប្រាប់ទៅលោក ប៉ុល សំអាត បញ្ឈប់ការចិញ្ចឹមទានៅទីតាំងដែលមានផលប៉ះពាល់ដល់បរិស្ថាន និងអ្នកជិតខាង ហើយត្រូវប្តូរទីតាំងយ៉ាងយូរបំផុតត្រឹមបំណាច់ខែមករា ឆ្នាំ២០២១ ហើយជាមួយគ្នា នៅពេលដែលប្តូរទីតាំងថ្មី ម្ចាស់កសិដ្ឋានក៏ត្រូវស្នើសុំមន្រ្តីជំនាញពិនិត្យ ផ្តល់យោបល់ និងមានការឯកភាពពីមន្រ្តីសមត្ថកិច្ចជំនាញផងដែរ៕
