(ព្រះសីហនុ) – ព្រះរាជអាជ្ញារង អមសាលាដំបូងខេត្តព្រះសីហនុ លោក លឹម ប៊ុនហេង បានបញ្ជាក់ថា ករណីហិង្សាក្នុងរឿងទំនាស់ដីធ្លីនៅភូមិអូរឧកញ៉ាហេង ស្ថិតក្នុងស្រុកព្រៃនប់ កាលពីសប្តាហ៍កន្លងទៅ រហូតមកទល់ពេលនេះ មានមនុស្សចំនួន៨នាក់ត្រូវបានចោទប្រកាន់ និងសម្រេចឃុំខ្លួនបណ្តោះអាសន្ន។
_
សូមបញ្ជាក់ថា ករណីហិង្សានេះ បានកើតឡើងកាលពីថ្ងៃទី២០ ខែធ្នូ ឆ្នាំ២០២០ ហើយបើតាមការលើកឡើងរបស់ប្រជាពលរដ្ឋថា មានទាំងករណីបាញ់គំរាមបំភ័យប្រជាពលរដ្ឋពីសំណាក់ក្រុមមនុស្សរបស់ក្រុមហ៊ុនទៀតផង ដោយពួកគាត់បានលើកឡើងថា មនុស្សរបស់ក្រុមហ៊ុនដែលបានលើកគ្នាមកវ៉ៃនិងបាញ់បំភ័យអ្នកភូមិនោះ ត្រូវបានសមត្ថកិច្ចនិងអាជ្ញាធរយកចិត្តទុកដាក់ ដឹកយកទៅពេទ្យ រីឯពួកគាត់ដែលជាប្រជាពលរដ្ឋវិញមិនត្រូវបានពួកគាត់យកចិត្តទុកដាក់ទេ គឺនាំគ្នាទៅរកពេទ្យព្យាបាលរបួសរៀងៗខ្លួន។
_
_
យ៉ាងណាក៏ដោយ ចំពោះករណីនេះ បើតាមលោក ឃាង ភារម្យ អ្នកនាំពាក្យសាលាខេត្តព្រះសីហនុ បានថ្លែងថា រឿងនេះ គឺយើងត្រូវញែកជាពីរ ទី១គឺជាទំនាស់ដីធ្លី និង ទី២ ជាការប្រើហិង្សា, អញ្ចឹងទំនាស់ដីធ្លី រដ្ឋបាលខេត្តកំពុងស្រាវជ្រាវរកឯកសារពាក់ព័ន្ធទាំងអស់ ដើម្បីយកមកធ្វើការដោះស្រាយ។ ដោយឡែកពាក់ព័ន្ធករណីហិង្សា បច្ចុប្បន្ន សំណុំរឿងនេះនៅតុលាការកំពុងចាត់ការ វានៅក្នុងនិតិវិធីរបស់តុលាការ៕
អត្ថបទ៖ នាគសមុទ្រ
