យោងតាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឲ្យដឹងថា នៅក្នុងឆ្នាំ២០២០នេះ ខ្លួនបានធ្វើការចុះបង្រ្កាបទីតាំងស្តុកទុក និងចែកចាយផលិតផលស៊ីហ្សា និងបារីអេឡិចត្រូនិច ចំនួន៩ករណីនៅតាមបណ្តារាជធានីខេត្ត ដោយរឹបអូសសរុបជិត ៥តោន។
_
ករណីទាំង៩នោះ មាននៅរាជធានីភ្នំពេញចំនួន៤ទីតាំង, ខេត្តបាត់ដំបងចំនួន ១ទីតាំង និងនៅខេត្តបន្ទាយមានជ័យ ចំនួន ៤ទីតាំង។
បើតាមការបញ្ជាក់របស់គណៈកម្មាធិការប្រយុទ្ធប្រឆាំងផលិតផលក្លែងក្លាយថា បច្ចុប្បន្ននេះ បារីអេឡិចត្រូនិច (E-Cigarette ឬ Vape) ត្រូវបានផ្សព្វផ្សាយយ៉ាងទូលំទូលាយតាមបណ្តាញសង្គម ជាឧបករណ៍ផ្តាច់បារី ប៉ុន្តែវាមិនដូច្នោះឡើយ។ ម្យ៉ាងវិញទៀតអ្នកប្រើប្រាស់បារីអេឡិចត្រូនិចនេះ ក៏មានការកើនឡើង និងកំពុងបានចរាចរលក់ចែកចាយនៅលើទីផ្សារកម្ពុជា ដោយរូបភាពលួចលាក់គួរឱ្យគត់សម្គាល់។
ទោះបីផលិតផលទាំងនេះ មិនមានសារធាតុញៀន ដែលមានចែងក្នុងតារាងឧបសម្ព័ន្ធ នៃច្បាប់ស្តីពីការត្រួតពិនិត្យគ្រឿងញៀន ប៉ុន្តែវាមានផ្ទុកនូវសារធាតុនីកូទីនសំយោគក្នុងកម្រិតខ្ពស់ ដែលបង្កឱ្យមានផលប៉ះពាល់យ៉ាងធ្ងន់ធ្ងរដល់សុខភាពដូចជា មហារីកសួត មហារីកក្រពះ មហារីកបំពង់អាហារ ជំងឺផ្លូវដង្ហើម ជំងឺបេះដូង និងតម្រងនោមជាដើម ហើយឧបករណ៍ជក់សម័យថ្មីមួយនេះ អាចនឹងមានគ្រោះថ្នាក់កាន់តែខ្លាំងជាងបារីទៀត ប្រសិនបើមានការផលិត ឬ ជនខិលខូចលាយបញ្ចូលនូវថ្នាំសម្រើប ឬគ្រឿងញៀនចូល៕
_
_
