(ភ្នំពេញ) – តាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឲ្យដឹងថា នៅថ្ងៃទី៦-៨ ខែមករា ប្រទេសកម្ពុជានឹងទទួលឥទ្ធិពលពីខ្យល់មូសុងឦសានជាមធ្យម ហើយនៅថ្ងៃទី៩-១២ ខែមករា ប្រទេសកម្ពុជា នឹងទទួលឥទ្ធិពលពីខ្យល់មូសុងឦសានខ្លាំង ដែលស្ថានភាពបែបនេះ នឹងធ្វើឲ្យប្រទេសកម្ពុជាចុះត្រជាក់ខ្លាំង ចាប់ពីថ្ងៃទី៩-១២ ខែមករា។
ក្នុងនោះ បណ្តាខេត្តនៅតំបន់វាលទំនាបកណ្តាល សីតុណ្ហភាពអាចនឹងចុះដល់ ១៥-១៧អង្សាសេ។
បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអាចចុះត្រជាក់ដល់ ១២-១៤ អង្សាសេ ជាមួយនឹងខ្យល់ខ្លាំង។
សម្រាប់តំបន់មាត់សមុទ្រវិញ សីតុណ្ហភាពអាចមានពី ១៨-២១អង្សាសេ ជាមួយនឹងខ្យល់ខ្លាំង និងរលកសមុទ្រខ្ពស់ៗ នៅថ្ងៃទី១២ ខែមករា៕
