(តាកែវ) – លោក កែម ចន ដែលត្រូវសារព័ត៌មានក្នុងស្រុកមួយចំនួនចុះផ្សាយថា គឺជាអ្នកកាងសង្វៀនបញ្ជល់មាន់ ជ្រកក្រោមផ្លាកកាស៊ីណូដ៏ធំមួយនៅក្បែរច្រកទ្វារអន្តរជាតិភ្នំដិននោះ បានធ្វើការប្រកាសគំរាមប្តឹងចំពោះអ្នកសារព័ត៌មានណាដែលយករូបថតរបស់លោកទៅចុះផ្សាយ ហើយថែមទាំងសរសេរឈ្មោះរបស់លោកខុសទៀតនោះ។
សូមបញ្ជាក់ថា ទីតាំងល្បែងគ្រប់ប្រភេទ ដែលជ្រកក្រោមផ្លាកកាស៊ីណូ ស្ថិតនៅក្បែរច្រកទ្វារអន្តរជាតិភ្នំដិន ត្រូវគេសង្កេតឃើញថា បានបើកលេងយ៉ាងគគ្រឹកគគ្រេង ដោយគេឃើញឈ្មោះ ចន នេះគឺជាអ្នកកាងការពារ ដោយថែមទាំងនិយាយថា ទីតាំងនេះ មិនមានអ្នកណាហ៊ានក្អក ឬហ៊ានមកក្បែរនោះទេ ព្រោះតែទីតាំងនេះ គឺមានភាគហ៊ុនពីស្នងការរងនគរបាលខេត្តតាកែវម្នាក់ទៀតផង។
យ៉ាងណាក៏ដោយ ទីតាំងល្បែងមួយនេះ គឺគេមិនឃើញសមត្ថកិច្ចណាហ៊ានទៅក្បែរមែន បើទោះទីតាំងនោះបានអនុញ្ញាតឲ្យជនជាតិខ្មែរចូលលេង ដែលខុសនឹងច្បាប់របស់រដ្ឋក៏ដោយ ហើយគេថែមទាំងឃើញរថយន្តទំនើបពាក់ផ្លាកលេខ នគរបាល ត្រូវគេបញ្ឈរចោលនៅទីនោះថែមទៀតផង៕