(តាកែវ) – លោក ភី ឆុន អធិការនគរបាលស្រុកសំរោង បានថ្លែងនៅព្រឹកថ្ងៃនេះថា ពេលនេះសមត្ថកិច្ចកំពុងរង់ចាំពាក្យបណ្តឹងរបស់ក្រុមគ្រួសាររងគ្រោះ ដែលបានចោទប្រកាន់ថា មន្រ្តីជនផលបានវាយដំ រហូតដល់ក្បែរស្លាប់ ហើយកំពុងសង្រ្គោះបន្ទាន់នៅមន្ទីរពេទ្យកាល់ម៉ែត្រនោះ។
លោកអធិការបានបញ្ជាក់ថា សមត្ថកិច្ចរង់ចាំតែពាក្យបណ្តឹងរបស់គ្រួសារជនរងគ្រោះប៉ុណ្ណោះ ហើយនៅពេលដាក់ពាក្យបណ្តឹងភ្លាម សមត្ថកិច្ចនឹងចុះធ្វើការស៊ើបអង្កេតតែម្តង។
លោក គឹម សារិទ្ធ នាយរងអធិការកិច្ចចតុមុខ និងជនរងគ្រោះដែលកំពុងសង្រ្គោះបន្ទាន់
គួរបញ្ជាក់ថា កាលពីយប់ថ្ងៃទី៦ ខែមករា មានបុរសម្នាក់ដែលមានអាយុប្រមាណ៤០ឆ្នាំ រស់នៅភូមិព្រៃផ្គាំ(គ) ស្រុកអង្គរបុរី បានរងរបួសធ្ងន់ក្នុងសភាពដូចត្រូវគេវាយដំ ដោយត្រូវបានមន្រ្តីជលផលបញ្ជូនយកទៅមន្ទីរពេទ្យបង្អែកខេត្តតាកែវ តែដោយសារស្ថានភាពធ្ងន់ធ្ងរពេក បុរសរូបនោះក៏ត្រូវបានក្រុមគ្រួសារបញ្ជូនបន្តទៅកាន់មន្ទីរពេទ្យកាល់ម៉ែត្រ រាជធានីភ្នំពេញ។
តាមបងថ្លៃជនរងគ្រោះបានឲ្យដឹងថា ជនរងគ្រោះមានឈ្មោះ ភឹម វី អាយុ ៤០ ឆ្នាំ នៅយប់កើតហេតុនោះ ជនរងគ្រោះ រួមជាមួយអ្នកភូមិចំនួន២នាក់ទៀត បានចេញទៅឆក់ត្រីនៅចំណុចកោះអញ្ចាញ ស្ថិតនៅក្នុងឃុំទ្រា ស្រុកសំរោង, ហើយនៅពេលនោះ ក៏មានទូករបស់មន្រ្តីជលផល ដែលដឹកនាំដោយលោក គឹម សារិទ្ធ នាយរងអធិការកិច្ចចតុមុខ បានមកដល់, ពេលនោះអ្នកភូមិ២នាក់ទៀតក៏បានរត់រួច ដោយនៅសល់តែជនរងគ្រោះត្រូវបានគេចាប់យកទៅ ហើយក្រោយមកទើបមានគេទូរស័ព្ទឲ្យទៅមើលជនរងគ្រោះនៅមន្ទីរពេទ្យ ដោយស្ថានភាពជនរងគ្រោះធ្ងន់ធ្ងរដូចត្រូវគេវាយ។
យ៉ាងណាក៏ដោយ ចំពោះករណីនេះ បើតាមលោក គឹម សារិទ្ធ នាយរងអធិការកិច្ចចតុមុខថា នេះគឺជាករណីទូកបុកគ្នា, លោកថា នៅយប់នោះ លោករួមជាមួយក្រុមការងារបានបើកទូកល្បាត ហើយក៏មានទូកមួយបានមកបុកទូករបស់លោក បន្ទាប់មកលោកក៏បត់ទូកត្រឡប់មកវិញដើម្បីសួរនាំ ហើយក៏ឃើញមនុស្ស២នាក់បានហែលទឹករត់ ដោយប្រហែលគេខ្លាចក្រុមលោកចាប់ ព្រោះគេប្រព្រឹត្តបទល្មើសនេសាទ បន្ទាប់មកលោកក៏ឃើញជនរងគ្រោះរងរបួស ហើយលោកក៏បានដឹកជនរងគ្រោះទៅកាន់មន្ទីរពេទ្យ ព្រមទាំងស្វែងរកគ្រួសារជនរងគ្រោះផងដែរ។
លោកនៅតែបញ្ជាក់ថា ករណីនេះ គឺជាគ្រោះថ្នាក់ចរាចរណ៍ មិនមែនជាករណីហិង្សានោះឡើយ។
សម្រាប់លោក សៅ កុសល្យ នាយខណ្ឌរដ្ឋបាលជលផលខេត្តតាកែវ បានមានប្រសាសន៍ថា តាមរបាយការណ៍ដែលលោកទទួលបាន ករណីនេះ គឺជាករណីទូកបុកគ្នា តែប្រសិនបើមន្ត្រីរបស់លោកបានប្រើហិង្សាលើជនរងគ្រោះ ដូចការចោទប្រកាន់មែន លោកនឹងចាត់វិធានការតាមច្បាប់៕
