តាកែវ – លោក ភី ឆុន អធិការនគរបាលស្រុកសំរោង បានបញ្ជាក់ជាថ្មីនៅព្រឹកថ្ងៃទី៩ មករា ឆ្នាំ២០២១នេះថា ករណីចោទប្រកាន់មន្រ្តីជលផលថាបានវាយដំប្រជាពលរដ្ឋម្នាក់បណ្តាលឲ្យរបួសធ្ងន់ស្ទើរស្លាប់នៅចំណុចកោះអញ្ចាញនោះ សមត្ថិច្ចនគរបាលមិនអាចបើកការស៊ើបអង្កេតបានទេ។
លោក ភី ឆុន អធិការស្រុកសំរោង, ជនរងគ្រោះ និងលោក គឹម សារិទ្ធ នាយរងអធិការកិច្ចចតុមុខ
តាមលោក ភី ឆុន ថា ករណីនេះលោកបានសុំយោបល់ទៅកាន់ថ្នាក់លើរបស់លោក គឺលោក ហ៊ិន សុខខេង ដែលជាស្នងការរងទទួលផែនព្រហ្មទណ្ឌ, ហើយថ្នាក់លើបានបញ្ជាក់មកលោកថា សំណុំរឿងនេះ គឺមន្រ្តីជលផលជាអ្នកកសាងសំណុំរឿងខ្លួនគេ ព្រោះថា មន្រ្តីជលផលក៏ជាមន្រ្តីនគរបាលយុត្តិធម៌ដែរ ដូច្នេះសមត្ថកិច្ចរបស់លោកមិនអាចលូកដៃចូលបានទេ។
ចំពោះការលើកឡើងនេះ បានធ្វើឲ្យក្រុមគ្រួសារជនរងគ្រោះបង្ហាញអារម្មណ៍អស់សង្ឃឹមយ៉ាងខ្លាំង ព្រោះថា ករណីនេះបានបង្ករឡើងដោយមន្រ្តីជលផល ហើយឥឡូវមន្រ្តីជលផលបែរជាធ្វើការស៊ើបអង្កេតខ្លួនឯងទៅវិញ តើនឹងមានយុត្តិធម៌ដែរ ឬទេ?
សូមបញ្ជាក់ថា ករណីហិង្សា ដែលត្រូវចោទប្រកាន់ថា បានប្រព្រឹត្តដោយមន្រ្តីជលផលនេះ បានកើតឡើងកាលពីយប់ថ្ងៃទី៦ ខែមករា ដោយមានជនរងគ្រោះឈ្មោះ ភឹម វី អាយុ៤០ឆ្នាំ រស់នៅភូមិព្រៃផ្គាំ(គ) ស្រុកអង្គរបុរី ខេត្តតាកែវ។
តាមការរៀបរាប់របស់បងថ្លៃជនរងគ្រោះថា នៅយប់កើតហេតុនោះ ជនរងគ្រោះ និងអ្នកភូមិចំនួន២នាក់ទៀត បានចេញទូកទៅឆក់ត្រីនៅចំណុចកោះអញ្ចាញ ស្ថិតនៅក្នុងឃុំទ្រា ស្រុកសំរោង, ហើយនៅពេលនោះ ក៏មានទូករបស់មន្រ្តីជលផល មានមនុស្សចំនួន១០នាក់ ដឹកនាំដោយលោក គឹម សារិទ្ធ នាយរងអធិការកិច្ចចតុមុខ បានមកដល់, ហើយពេលនោះ អ្នកភូមិ២នាក់ដែលទៅជាមួយក៏បានលោតចូលទឹក ហើយក៏រត់រួច ដោយនៅសល់តែជនរងគ្រោះត្រូវបានមន្រ្តីជលផល និងបក្ខពួកវាយបណ្តាលឲ្យរងរបួសធ្ងន់ ហើយគេក៏បញ្ជូនទៅកាន់មន្ទីរពេទ្យបង្អែកខេត្តតាកែវ និងបានទូរស័ព្ទឲ្យក្រុមគ្រួសារទៅមើលជនរងគ្រោះនៅមន្ទីរពេទ្យ ហើយពេលនោះដោយស្ថានភាពជនរងគ្រោះធ្ងន់ធ្ងរពេក ទើបក្រុមគ្រួសារបញ្ជូនជនរងគ្រោះបន្តមកកាន់មន្ទីរពេទ្យកាល់ម៉ែត្រក្នុងរាជធានីភ្នំពេញ។
បើតាមប្រជាពលរដ្ឋនៅមូលដ្ឋានថា លោក គឹម សារិទ្ធ នាយរងអធិការកិច្ចចតុមុខនេះ កាលពីឆ្នាំកន្លងទៅ ក៏ធ្លាប់មានរឿងអាស្រូវបាញ់ប្រជាពលរដ្ឋបណ្តាលឲ្យរងរបួសផងដែរ ប៉ុន្តែសំណុំរឿងនោះបានស្ងាត់ឈឹង។
យ៉ាងណាក៏ដោយ ចំពោះករណីចុងក្រោយនេះ លោក គឹម សារិទ្ធ នាយរងអធិការកិច្ចចតុមុខ បានថ្លែងថា គ្មានការប្រើហិង្សាទៅលើជនរងគ្រោះនោះទេ ហើយថា វាគឺជាករណីគ្រោះថ្នាក់ចរាចរណ៍ ដោយទូកបុកគ្នា, លោកថា នៅយប់នោះ លោករួមជាមួយក្រុមការងារបានបើកទូកល្បាត ហើយក៏មានទូកមួយបានមកបុកទូករបស់លោក បន្ទាប់មកលោកក៏បត់ទូកត្រឡប់មកវិញដើម្បីសួរនាំ ហើយក៏ឃើញមនុស្ស២នាក់បានហែលទឹករត់, បន្ទាប់មកលោកក៏ឃើញជនរងគ្រោះរងរបួស ហើយលោកក៏បានដឹកជនរងគ្រោះទៅកាន់មន្ទីរពេទ្យ ព្រមទាំងស្វែងរកគ្រួសារជនរងគ្រោះទៀត៕
