តាកែវ – ប្រភពពីក្រុមអាជីវករម្ចាស់ស្ថានីយ៍ប្រេងឥន្ធនៈ នៅក្នុងខេត្តតាកែវបានឲ្យដឹងថា មុននឹងបានបើកលក់ប្រេងមួយកន្លែងៗ គឺពួកគាត់ត្រូវបានចំណាយលុយឲ្យទៅក្រុមកូនចៅរបស់លោក ផេង វុធ ប្រធានមន្ទីររ៉ែ និងថាមពលខេត្តតាកែវ ក្នុងស្ថានីយ៍ប្រេងមួយកន្លែងចំនួន២០០០ដុល្លារ ទើបអាចបើកដំណើរការលក់បាន។
ម្ចាស់ស្ថានីយ៏ប្រេងមួយកន្លែងនៅក្នុងស្រុកសំរោងបានថ្លែងថា កាលពីពេលថ្មីៗនេះក្រុមមន្រ្តី នៃមន្ទីររ៉ែនិងថាមពល ដែលគេស្គាល់ថា ជាកូនចៅលោក ផេង វុធ បានចុះមកយកលុយពីគាត់ចំនួន២០០០ដុល្លារ ដើម្បីយកទៅបំពេញបែបបត់ច្បាប់នៅក្រសួងរ៉ែ និងថាមពល។
បើតាមអ្នកបើកស្ថានីយ៏ប្រេងដ៏ទៃទៀតក្នុងខេត្តតាកែវ ក៏បានបញ្ជាក់ដូចគ្នានេះដែរថា ក្រុមមន្រ្តីដែលជាកូនចៅរបស់លោក ផេង វុធ ក៏បានមកយកលុយពីពួកគាត់ដូចគ្នាដែរ តែគេមិនដែលឃើញលោក ផេង វុធ មានវិធានការលើក្រុមមន្ត្រីទាំងនោះទេ ព្រោះមន្រ្តីទាំងនោះថា គេយកលុយទៅឲ្យមេ។
ពាក់ពន្ធ័ករណីខាងលើនេះ លោក ផេង វុធ ប្រធានមន្ទីររ៉ែ និងថាមពលខេត្តតាកែវបានថ្លែងថា លោកមិនបានដឹងថាក្រុមកូនចៅរបស់លោកដើរធ្វើសកម្មភាពបែបនេះសោះ ហើយថា លោកបានដឹងរឿងច្រើនខ្លះៗចំពោះមន្រ្តីរូបហ្នឹង តែវាមិនទាន់មានភ័ស្តុតាង ដូច្នេះលោកបានត្រឹមតែអប់រំនោះទេ តែចំពោះករណីថ្មីៗនេះ បើដូចការលើកឡើងមែនលោកនឹងចាត់ការមន្រ្តីរបស់លោកតាមផ្លូវច្បាប់ហើយ៕
