តាកែវ – ករណីក្រុមរថយន្តដឹកដីរបស់ឈ្មួញដែលបានបើកលើខឿនប្រាសាទសែនភូវាំង មានអាយុកាលជាង១ពាន់ឆ្នាំ ស្ថិតនៅខាងកើតភ្នំជីសូនោះ ទីបំផុតខាងមន្ទីរវប្បធម៌ និងវិចិត្រសិល្បៈខេត្តតាកែវ បានចុះទៅធ្វើការពិនិត្យហើយ ដោយបានត្រឹមតែណែនាំម្ចាស់ឡានដឹកដី និងអាជ្ញាធរប៉ុណ្ណោះ។
លោក ជេត ពិសុទ្ធ ប្រធានមន្ទីរវប្បធម៌ និងវិចិត្រសិល្បៈខេត្តតាកែវ បានថ្លែងថា លោកបានចុះទៅពិនិត្យមើលករណីរថយន្តដឹកដីបើកលើខឿនប្រាសាទនោះហើយ ដោយបានហៅអាជ្ញាធរមកធ្វើការបំភ្លឺចំពោះករណីនេះ។ ជាមួយគ្នាលោកក៏បានធ្វើការពិនិត្យមើលលើច្បាប់របស់ក្រុមរថយន្តដឹកដីនោះដែរ ហើយឃើញថា ក្រុមរថយន្តដឹកដីនោះ ពុំមានច្បាប់អនុញ្ញាតពីអាជ្ញាធរស្រុកសំរោង ដូច្នេះលោកក៏បានធ្វើការណែនាំអាជ្ញាធរស្រុកសំរោង កុំឲ្យមានករណីនេះទៀត។
គួរបញ្ជាក់ថា កាលពីដើមខែនេះ គេបានប្រទះឃើញរថយន្តដឹកដីជាច្រើនគ្រឿង ដែលសុទ្ធសឹងតែជាប្រភេទ ៥តោន បានធ្វើសកម្មភាពដឹកដី ដោយបើកកាត់លើខឿនប្រាសាទសែនភូវាំង ដែលជាប្រាសាទសែស្រឡាយជាមួយប្រាសាទភ្នំជីសូ សាងសង់កាលពី១ពាន់ឆ្នាំមុន។
ការដែលហ៊ានបើករថយន្តដឹកដីធុនធំៗកាត់លើខឿនប្រាសាទដោយមិនញញើតនេះ ត្រូវម្ចាស់រថយន្តដឹកដីទាំងនោះនិយាយថា គឺគេទទួលបានការអនុញ្ញាតពីអាជ្ញាធរឃុំ រហូតដល់ស្រុក ដោយមុនធ្វើការដឹកនោះ គឺមានទាំងក្រុមប្រឹក្សាឃុំចុះមកពិនិត្យទៀតផង៕