តាកែវ – តាមការបញ្ជាក់របស់លោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវបានឲ្យដឹងថា ចំពោះចោទប្រកាន់មន្រ្តីជលផលប្រើហិង្សាទៅលើប្រជាពលរដ្ឋបណ្តាលឲ្យរងរបួសធ្ងន់នៅចំណុចកោះអញ្ចាញ ស្រុកសំរោងនោះ ពេលនេះ លោកបានប្រាប់ឲ្យអធិការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តតាកែវ បើកការស៊ើបអង្កេតបឋម ចំពោះករណីនេះហើយ។
សូមបញ្ជាក់ថា សំណុំរឿងនេះ គ្រួសារជនរងគ្រោះបានចោទប្រកាន់លោក គឹម សារិទ្ធ នាយរងអធិការកិច្ចចតុមុខ និងបក្ខពួកចំនួន៩នាក់ផ្សេងទៀតថា ថាបានប្រើហិង្សាដោយវាយដំជនរងគ្រោះ នៅពេលក្រុមមន្រ្តីជលផលទាំងនេះបានបើកប្រតិបត្តិការបង្រ្កាបបទល្មើសនេសាទ កាលពីយប់ថ្ងៃទី៦ ខែមករា ឆ្នាំ២០២១ នៅចំណុចកោះអញ្ចាញ ក្នុងឃុំទ្រា ស្រុកសំរោង ខេត្តតាកែវ។
លោក គឹម សារិទ្ធ នាយរងអធិការកិច្ចចតុមុខ
តាមការរៀបរាប់របស់បងថ្លៃជនរងគ្រោះថា នៅយប់កើតហេតុនោះ ជនរងគ្រោះឈ្មោះ ភឹម វី អាយុ៤០ឆ្នាំ រស់នៅភូមិព្រៃផ្គាំ(គ) ស្រុកអង្គរបុរី ខេត្តតាកែវ និងអ្នកភូមិចំនួន២នាក់ទៀត បានចេញទូកទៅឆក់ត្រីនៅចំណុចកោះអញ្ចាញ ស្ថិតនៅក្នុងឃុំទ្រា ស្រុកសំរោង, ហើយនៅពេលនោះ ក៏មានទូករបស់មន្រ្តីជលផល មានមនុស្សចំនួន១០នាក់ ដឹកនាំដោយលោក គឹម សារិទ្ធ នាយរងអធិការកិច្ចចតុមុខ បានមកដល់, ពេលនោះ អ្នកភូមិ២នាក់ដែលទៅជាមួយក៏បានលោតចូលទឹក ហើយក៏រត់រួច ដោយនៅសល់តែជនរងគ្រោះត្រូវបានមន្រ្តីជលផល និងបក្ខពួកវាយបណ្តាលឲ្យរងរបួសធ្ងន់ ទើបគេក៏បញ្ជូនទៅកាន់មន្ទីរពេទ្យបង្អែកខេត្តតាកែវ និងបានទូរស័ព្ទឲ្យក្រុមគ្រួសារទៅមើលជនរងគ្រោះនៅមន្ទីរពេទ្យ ហើយដោយស្ថានភាពជនរងគ្រោះធ្ងន់ធ្ងរពេក ទើបក្រុមគ្រួសារបញ្ជូនជនរងគ្រោះបន្តមកកាន់មន្ទីរពេទ្យកាល់ម៉ែត្រក្នុងរាជធានីភ្នំពេញ។
រហូតមកដល់ពេលនេះ ជនរងគ្រោះនៅមិនទាន់ដឹងខ្លួននៅឡើយទេ ហើយក្រុមគ្រូពេទ្យក៏អស់លទ្ធភាពព្យាបាលដែរ ដោយឲ្យក្រុមគ្រួសារយកជនរងគ្រោះមកផ្ទះវិញ ព្រោះតែជនរងគ្រោះមានឈាមកកនៅក្នុងខួរក្បាល។
ជនរងគ្រោះឈ្មោះ ភឹម វី
តែយ៉ាងណាក៏ដោយ ចំពោះករណីនេះ លោក គឹម សារិទ្ធ បានធ្វើការបដិសេធ ដោយថា ករណីនេះ គឺជាករណីគ្រោះថ្នាក់ចរាចរណ៍ ទូកបុកគ្នានោះទេ៕
