តាកែវ – តាមសាច់ញាតិជនរងគ្រោះបានបញ្ជាក់ថា ឈ្មោះ ភឹម វី អាយុ៤០ឆ្នាំ ដែលត្រូវមន្រ្តីជលផលវាយដំបណ្តាលឲ្យរងរបួសធ្ងន់នោះ ពេលនេះបានស្លាប់ហើយ ក្រោយពីបានយកត្រឡប់ពីមន្ទីរពេទ្យកាលពីថ្ងៃម្សិលមិញ។
លោក សៅ កុសល នាយខណ្ឌរដ្ឋបាលជលផលខេត្តតាកែវបានថ្លែងថា លោកបានរៀបចំថវិកាមនុស្សធម៌មួយចំនួន ដើម្បីជួយដល់ក្រុមគ្រួសារជនរងគ្រោះផងដែរ, ដោយឡែកលោក គឹម សារិទ្ធ ដែលរងការចោទប្រកាន់នោះ លោកមិនដឹងថា តើគាត់នឹងចូលរួមបុណ្យសពដែរ ឬយ៉ាងណាទេ ព្រោះតែលោក គឹម សារិទ្ធ គឺគាត់តែងតែធ្វើការឯករាជ្យ ដោយមិនដែលទាក់ទងជាមួយនឹងលោកទេ។
សូមបញ្ជាក់កាលពីយប់ថ្ងៃទី៦ ខែមករា ឆ្នាំ២០២១ ជនរងគ្រោះឈ្មោះ ភឹម វី រស់នៅភូមិព្រៃផ្គាំ(គ) ស្រុកអង្គរបុរី ខេត្តតាកែវ ត្រូវបានក្រុមមន្រ្តីជលផលដឹកយកទៅកាន់មន្ទីរពេទ្យបង្អែកខេត្តតាកែវ ក្រោយពីរងរបួសយ៉ាងធ្ងន់ធ្ងរ ដោយក្រុមមន្រ្តីជលផល ដឹកនាំដោយលោក គឹម សារិទ្ធ និយាយថា ជនរងគ្រោះបានជួបគ្រោះថ្នាក់ចរាចរណ៍ ដោយទូកជនរងគ្រោះបានបុកជាមួយទូកមន្រ្តីជលផល នៅចំណុចកោះអញ្ចាញ ស្ថិតក្នុងឃុំទ្រា ស្រុកសំរោង។
តែបើតាមការអះអាងរបស់បងថ្លៃជនរងគ្រោះថា ជនរងគ្រោះរបួសធ្ងន់នេះ គឺដោយសារការវាយដំ ក្រោយជនរងគ្រោះទៅប្រព្រឹត្តបទល្មើសនេសាទនៅលើបឹងនោះ។
បងថ្លៃជនរងគ្រោះបានបញ្ជាក់ថា នៅយប់កើតហេតុនោះ ជនរងគ្រោះ និងអ្នកភូមិចំនួន២នាក់ទៀត បានចេញទូកទៅឆក់ត្រីនៅចំណុចកោះអញ្ចាញ ស្ថិតនៅក្នុងឃុំទ្រា ស្រុកសំរោង, ហើយនៅពេលនោះ ក៏មានទូករបស់មន្រ្តីជលផល មានមនុស្សចំនួន១០នាក់ ដឹកនាំដោយលោក គឹម សារិទ្ធ នាយរងអធិការកិច្ចចតុមុខ បានមកដល់, ពេលនោះ អ្នកភូមិ២នាក់ដែលទៅជាមួយក៏បានលោតចូលទឹក ហើយក៏រត់រួច ដោយនៅសល់តែជនរងគ្រោះត្រូវបានមន្រ្តីជលផល និងបក្ខពួកវាយបណ្តាលឲ្យរងរបួសធ្ងន់ ទើបគេក៏បញ្ជូនទៅកាន់មន្ទីរពេទ្យបង្អែកខេត្តតាកែវ និងបានទូរស័ព្ទឲ្យក្រុមគ្រួសារទៅមើលជនរងគ្រោះនៅមន្ទីរពេទ្យ ហើយដោយស្ថានភាពជនរងគ្រោះធ្ងន់ធ្ងរពេក ទើបក្រុមគ្រួសារបញ្ជូនជនរងគ្រោះបន្តមកកាន់មន្ទីរពេទ្យកាល់ម៉ែត្ររាជធានីភ្នំពេញ ហើយកាលពីថ្ងៃម្សិលមិញ គ្រូពេទ្យក៏បានឲ្យក្រុមគ្រួសារយកជនរងគ្រោះត្រឡប់មកផ្ទះវិញ ព្រោះតែអស់លទ្ធភាពព្យាបាល ដោយសារជនរងគ្រោះមានឈាមកកក្នុងខួក្បាល។
យ៉ាងណាក៏ដោយ ចំពោះករណីនេះ លោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ បានបញ្ជាក់ថា លោកបានស្នើដល់ស្នងការរងទទួលផែនព្រហ្មទណ្ឌ នៃស្នងការនគរបាលខេត្តតាកែវ បើកការស៊ើបអង្កេតបឋម ចំពោះករណីនេះហើយ៕