ក្នុងសេចក្តីជូនដំណឹងរបស់រដ្ឋបាលខេត្តកណ្តាលបានឲ្យដឹងថា មនុស្សចំនួន២០០នាក់ ក្នុងនោះមានភ្ញៀវទេសចរចំនួន៧៧នាក់ និងនាវិកចំនួន១២៣នាក់ នៅលើនាវាចំនួន៥គ្រឿង ដែលត្រូវអាជ្ញាធរវៀតណាមហាមមិនឲ្យចូលចត ហើយកម្ពុជាបានអនុញ្ញាតឲ្យត្រឡប់មកវិញនោះ មានសុខភាពល្អ និងមិនមានសញ្ញាផ្ទុកមេរោគ Covid-19 នោះទេ ហើយត្រូវបានអនុញ្ញាតឲ្យចាកចេញពីច្រកទ្វារព្រំដែនអន្តរជាតិក្អមសំណរ ទៅកាន់កំពង់ផែស្វយ័តភ្នំពេញវិញ។
គួរបញ្ជាក់ថា នាវាទេសចរណ៍ទាំង៥គ្រឿងនេះ សុទ្ធសឹងតែមានសញ្ជាតិខ្មែរ ត្រូវអាជ្ញាធរវៀតណាម មិនអនុញ្ញាតឲ្យចូលចតដាក់អ្នកទេសចរកាលពីថ្ងៃទី១៦ ខែមីនា កន្លងទៅនេះ ដោយភ័យព្រួយពីការចម្លង Covid-19។ យ៉ាងណាក៏ដោយ ដោយមានគោលការណ៍ពីរាជរដ្ឋាភិបាល នាវាទាំង៥គ្រឿងនោះបានត្រឡប់ចូលមកប្រទេសកម្ពុជាវិញតាមច្រកទ្វារអន្តរជាតិក្អមសំណរ ហើយសមត្ថកិច្ច និងគ្រូពេទ្យចត្តាឡីស័ក ក៏បានចុះទៅទីតាំងនោះដើម្បីធ្វើការសម្របសម្រួល និងត្រួតពិនិត្យលើស្ថានភាពសុខភាពអ្នកដំណើរក្នុងនាវាទាំងអស់៕
