តាកែវ – ជនសង្ស័យម្នាក់ត្រូវបានកម្លាំងកងរាជអាវុធហត្ថខេត្តតាកែវឃាត់ខ្លួន ក្រោយពីបានលួចរថយន្តស៊េរីទំនើបមួយគ្រឿងពីខណ្ឌច្បារអំពៅ រាជធានីភ្នំពេញ។
ជនសង្ស័យលួចរថយន្តត្រូវសមត្ថកិច្ចចាប់ខ្លួន
តាមមន្រ្តីអាវុធហត្ថថា រថយន្តស៊េរីទំនើបនោះម៉ាកវីហ្គោផលិតឆ្នាំ២០២០ ពាក់ផ្លាកលេខ ភ្នំពេញ 2BB 7471 ពណ៌ស ត្រូវបានជនសង្ស័យលួចយកពីចំណុចភូមិចុងព្រែក សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
ក្រោយពីបានបាត់ ម្ចាស់រថយន្ត ឈ្មោះ យឹម សុវណ្ណាន មានទីលំនៅ នៅកន្លែងកើតហេតុ បានប្តឹងសមត្ថកិច្ចឲ្យជួយអន្តរាគមន៍។ បន្ទាប់មកសមត្ថកិច្ចខណ្ឌច្បារអំពៅបានបើកប្រតិបត្តការ រហូតកំណត់មុខសញ្ញានិងទិសដៅដែលជនសង្ស័យកំពុងធ្វើចរាចរគឺនៅលើផ្លូវជាតិលេខ២។
រហូតដល់ម៉ោង៨ និង៣០នាទីយប់ថ្ងៃទី២១ ខែមករា ឆ្នាំ២០២១ ជនសង្ស័យត្រូវបានចាប់ខ្លួនដោយកម្លាំងជំនាញកងរាជអាវុធហត្ថខេត្តតាកែវនៅលើដងផ្លូវជាតិលេខ២ ត្រង់ចំណុចភូមិរូង ឃុំលំចង់ ស្រុកសំរោង ខេត្តតាកែវ។
ជនសង្ស័យមានឈ្មោះ យ៉ា សម្បត្តិ ភេទប្រុស មានទីលំនៅក្បែរផ្ទះជនរងគ្រោះដែរ។
បច្ចុប្បន្នជនសង្ស័យត្រូវបានកម្លាំងកងរាជអាវុធហត្ថខេត្តតាកែវកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី៕
