ព្រះសីហនុ – ភោជនីយដ្ឋាន KO-KAI ដែលជាភោជនីយដ្ឋានដ៏ល្បីល្បាញរបស់ជប៉ុន បានបើកនៅខេត្តព្រះសីហនុហើយ ដោយបានធ្វើពិធីសម្ពោធកាលពីរសៀលថ្ងៃទី១ ខែកុម្ភៈ ឆ្នាំ២០២១ ក្រោមការចូលរួមពី ឯកឧត្តម មិកាមិ ម៉ាសាហ៊ីរ៉ូ (MIKAMI MASAHIRO) ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា និងឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ។
ឯកឧត្តម មិកាមិ ម៉ាសាហ៊ីរ៉ូ (MIKAMI MASAHIRO) ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា បានថ្លែងអំណរគុណ ឯកឧត្តមអភិបាលខេត្តព្រះសីហនុ ដែលបានចូលរួមបើកសម្ពោធភោជនីយដ្ឋានជប៉ុន KO-KAI នៅខេត្តព្រះសីហនុ និងសូមចូលរួមគាំទ្រដើម្បីឱ្យភោជនីយដ្ឋានជប៉ុនដំណើរការរលូន និងអាចទាក់ទាញភ្ញៀវទេសចរ និងអ្នកវិនិយោគជប៉ុនមកកាន់ខេត្តព្រះសីហនុកាន់តែច្រើនឡើងនាពេលខាងមុខ។
ឯកឧត្តម គួច ចំរើន អភិបាលខេត្តព្រះសីហនុ មានប្រ សាសន៍ថា ឯកឧត្តមមានអារម្មណ៍ថា មានអាហារដ្ឋានជប៉ុននៅទីនេះ គឺនាំមកនូវអ្នកវិនិយោគ និងភ្ញៀវទេសចរជប៉ុន។ អាហារដ្ឋានជប៉ុននេះ ផ្តល់ការងារជូនយុវជនកម្ពុជា រួមចំណែកអភិវឌ្ឍសេដ្ឋកិច្ចខេត្តព្រះសីហនុកាន់តែល្អប្រសើរ។
ឯកឧត្តមអភិបាលខេត្ត សូមស្វាគមន៍អាហាដ្ឋានជប៉ុន និងចង់ឃើញអ្នកវិនិយោគជប៉ុនមកកាន់ទីនេះ កាន់តែច្រើន។ ឯកឧត្តមអភិបាលខេត្តបានរំលឹកផងដែរថាកាលពីឆ្នាំ២០០០ កន្លងទៅ ឯកឧត្តមបានអញ្ជើញទៅសិក្សាផ្នែកកិច្ចការរដ្ឋបាលនៅប្រទេសជប៉ុន ហើយឯកឧត្តមបានភ្លក់សាច់អាំងនៅប្រទេសជប៉ុន គឺមានរសជាតិឆ្ងាញ់ពិសារ ហើយឯកឧត្តមចង់ឃើញនៅខេត្តព្រះសីហនុ មានភោជនីយដ្ឋានជប៉ុន កាន់តែច្រើនបន្ថែមទៀត។
សូមបញ្ជាក់ថា ភោជនីយដ្ឋានជប៉ុន KO-KAI មានទីតាំងស្ថិតនៅតាមបណ្តោយផ្លូវ ៧មករា ស្ថិតក្នុងភូមិ៣ សង្កាត់៤ ក្រុងព្រះសីហនុ ខេត្តព្រះសីហនុ៕
ដោយ នាគសមុទ្រ